Astananyń bas sanıtarlyq dárigeri turǵyndarǵa úndeý jasady

NUR-SULTAN. QazAqparat – Nur-Sultan qalasynyń bas memlekettik sanıtar dárigeri Sarhat Beısenova elorda turǵyndaryn saqtyq sharalaryn ustanýǵa shaqyrdy, dep habarlaıdy QazAqparat tilshisi.

«Qaladaǵy epıdemıologııalyq jaǵdaı turaqsyz bolyp qalýda. Osyǵan baılanysty qala turǵyndaryna, ásirese úı karantınindegi adamdarǵa, sondaı-aq kásipkerlik sýbektilerine aıtarym: barlyq shekteý sharalary men sanıtarlyq erejelerdi saqtańyzdar. Bul, ınfektsııanyń taralýyn tómendetýge jáne aýrý qaýpin azaıtýǵa múmkindik beredi», - dedi bas memlekettik sanıtar dáriger elorda ákimdiginde ótken brıfıngte.

Onyń atap ótýinshe, qalada jaǵdaıdy turaqtandyrý jáne COVID-19-dy jeńý úshin turǵyndardy jappaı vaktsınalaý júrip jatyr. Bul ujymdyq ımmýnıtetti damytýǵa jáne ádettegi ómir yrǵaǵyna oralýǵa múmkindik beredi.

«Árbir turǵyndy barshaǵa belgili saqtyq sharalaryn ustanýǵa, atap aıtqanda qoǵamdyq oryndarda betperde kııýge, áleýmettik qashyqtyqty saqtaýǵa, buqaralyq is-sharalardy uıymdastyrmaýǵa jáne qatyspaýǵa shaqyramyn. Qala turǵyndaryn óz densaýlyǵyna jáne aınalasyndaǵy adamdardyń densaýlyǵyna jaýapkershilikpen qaraýdy suraımyn», - dedi Sarhat Beısenova.

Eske salaıyq, Nur-Sultan qalasy koronavırýs ahýalyn baǵalaý matrıtsasynda 1,5 aı boıy «qyzyl» aımaqta tur.