Astananyń bas polıtseıi kúmándi tulǵalar týraly habarlaýdy surady

NUR-SULTAN. QazAqparat – Nur-Sultan qalasynyń turǵyndarynan kúdikti tulǵalar jóninde habarlap otyrý suraldy, dep habarlaıdy QazAqparat «Habar 24» telearnasyna silteme jasap.

«Quqyqtyq tártip» operatsııasy aıasynda elorda polıtseıleri aýlalar men úılerdi aralaýda.

Polıtsııa departamentiniń baspasóz qyzmetinen málim etkendeı, qalada ahýal turaqty, barlyǵy baqylaýda.

Bul rette, elordada komendanttyq saǵat jalǵasýda. Tótenshe jaǵdaı rejıminiń talabyn buzǵany úshin 22 adam jaýapkershilikke tartyldy. Mas kúıde rýlge otyrǵan 2 júrgizýshi arnaıy qabyldaý ornyna jetkizildi.

Sońǵy 3 táýlikte 45 qylmys tirkeldi. Ákimshilik quqyqbuzýshylyqtar sany 2 myńnan asqan. Tótenshe jaǵdaı rejımi engizilgeli 102 nomerine qońyraýlar eki esege artqan. Departament esebinshe, olardyń sany 9 myńnan asady. Halyq negizinen, Nur-Sultanǵa kirip-shyǵý tártibi, Halyqqa qyzmet kórsetý ortalyqtarynyń, bankter men saýda ortalyqtarynyń jumysy týraly suraqtar qoıýda.

«Eger sizderge kúmán týdyratyn tulǵalar týraly faktiler belgili bolsa, polıtseılerge habarlańyz. Komendanttyq saǵat jalǵasýda. Úıde qalýdy ótinemiz. Qala ýmaǵynan qajet bolmaǵan jaǵdaıda shyqpaýdy jáne balalaryńyzdyń ornalasqan jerin baqylaýda ustaýdy suraımyz. Munyń barlyǵy sizdiń qaýipsizdigińiz ben tártiptiń saqtalýy úshin jasalýda», - dedi Nur-Sultan qalalyq Polıtsııa departamentiniń bastyǵy Erjan Sádenov.