Astananyń barlyq JEO-lary gazǵa aýystyrylady

ASTANA. QazAqparat - 2020 jyly Astanadaǵy barlyq úsh jylý elektr ortalyǵy, sonymen birge Ońtústik Shyǵys, Kóktal-1 jáne Kóktal-2 shaǵyn aýdandary tolyǵymen gazben qamtylady. Bul týraly Elbasynyń qatysýymen ótip jatqan elordany odan ári damytý máseleleri jónindegi májiliste Astana qalasynyń ákimi Áset Isekeshev málim etti, dep habarlaıdy «QazAqparat» HAA tilshisi.

«Bes áleýmettik bastama aıasynda Qazaqstannyń ortalyq óńirlerin gazben qamtý týraly tapsyrmańyz shynynda da, tarıhı sheshim bolyp tabylady. Ol elordamyzdyń damýyna erekshe serpin berip, eń aldymen ekologııanyń jaqsarýyna septigin tıgizedi», - dedi qala basshysy májiliste.

Onyń aıtýynsha, qazirgi ýaqytta qala ákimdigi Energetıka mınıstrligi jáne «QazTransGaz» AQ-pen birge jol kartasyn ázirlep jatyr.

«Qazirgi tańda qalalyq gaz tartý jelileri boıynsha 3 kezekten turatyn tehnıkalyq-ekonomıkalyq negizdeme jasaldy. Alǵashqy kezeńde 2020 jyly Astanadaǵy barlyq úsh JEO-ny (17 sý qaınatatyn qazandyq) gazǵa aýystyrý kózdelip otyr. Sonymen qatar, tútin kóp shyǵatyn Ońtústik Shyǵys, Kóktal-1 jáne Kóktal-2 shaǵyn aýdandaryn gazǵa 2020 jylǵa deıin aýystyrý josparlanýda. Bul sharalar aýaǵa zııandy zattardyń bólinisin 30 paıyzǵa deıin tómendetedi», - dedi Á.Isekeshev.