Astananyń barlyq avtobýstaryna valıdator ornatylady
ASTANA. QazAqparat - Jańa jyldan bastap elordanyń barlyq avtobýstarynda jolaýshylar jol aqysyn elektrondy jolmen tóleı alady. Bul jaıynda «Astana LRT» JShS qoǵammen baılanys departamentiniń dırektory Asqar Ataǵýlın aıtty, dep habarlaıdy QazAqparat.
«Valıdatsııa nemese jolaqysyn elektrondyq tólem jasaý júıesi Jańa jyldan bastap barlyq avtobýstarda tolyqqandy jumys isteıtin bolady», - dedi ol.
Onyń sózine qaraǵanda, qazirgi ýaqytta barlyq avtobýstarda jolaqysyna elektrondyq tólem jasaýǵa múmkinshilik bolmaýynyń eki sebebi bar.
«Birinshi sebebi, eski avtobýstar jolaqysyn elektrondyq tóleý júıesin engizýge jaramsyz. Ekinshisi bastapqyda qaperge alynbaǵan tehnıkalyq erekshelikteri bar. Jobany ázirleý kezeńinde bul erekshelikter qaperge alynbaǵan. Soǵan baılanysty qazirgi ýaqytta belgili bir problemalar týyndaýda. Degenmen, biz sheshý joldaryn taptyq jáne Jańa jyldan bastap qalalyq úlgidegi barlyq avtobýstarda valıdatsııa múltiksiz jumys istedi», - dedi kompanııa ókili.
Sonymen qatar ol qoǵamdyq kólikterdiń keıbir kondýktorlarynyń dórekiligine qatysty shaǵymdardyń jıi bolýyna qatysty pikirin bildirdi.
«Júrgizýshiler men kondýktorlar - olar avtobýs parkiniń qyzmetkerleri. Olardyń bizge múldem esh qatysy joq. Biz tasymaldaýdy basqarýmen aınalysamyz jáne avtobýstardyń belgilengen ýaqytta belgili sanynyń reıske shyǵýyna jaýap beremiz. Qazirgi ýaqytta qyzmet sapasyna avtobýs parkteriniń basshylyǵy tikeleı jaýap beredi», - dedi ol.
Ataǵýlınniń aıtýyna qaraǵanda, Jańa jyldan bastap qyzmetke qoıylatyn talaptar men avtobýs parkterimen aradaǵy kelisimsharttar qaıta qaralatyn bolady.
«Jańa jyldan bastap avtobýs parkterimen sharttardy qaıta qarastyrýdy josparlap otyrmyz. Onda qyzmet sapasyna naqty talaptar kózdelgen. Búgingi kúni bizge baqylaý-qadaǵalaý qyzmeti júktelmegen», - dedi ol.
