Astananyń balalar bı ansambli Sankt-Peterbýrgte ótken horeografııalyq baıqaýdyń laýreaty atandy
ASTANA. QazAqparat - Astananyń «Merýert» halyq ansambli 1 sáýirde Sankt-Peterbýrg qalasynda ótken «Tvorcheskıe otkrytııa» XXV Halyqaralyq festıval-baıqaýynda «Horeografııa Teatr» atalymy boıynsha І dárejeli laýreat atandy, dep habarlaıdy qalalyq ákimdiktiń baspasóz qyzmeti.
Ansambl quramyna 8-10 jas aralyǵyndaǵy 11 bala kiredi. Elordalyq ansambl kishi jas tobynda horeografııalyq shyǵarmashylyq, estrada bıi nomınatsııasyna qatysty. Ujym jetekshisiniń aıtýynsha, balǵyndar «Bıpyl» qazaq bıimen jáne «Kir jýý» atty ázil bıimen kórermenniń yqylasyna bólendi. Daýys berýdiń nátıjesinde qazylar alqasy baıqaýdyń jarqyn nomerleriniń ishinen «Kir jýý» bıin tańdaǵan.
«Gala-kontsertte qyzdar jandaryn salyp bıledi! Jas bıshilerdiń emotsııaǵa toly kóńildi bıi kórermenderdi bir serpiltip tastady. Ansambldiń solısi Aıǵanym Esimhanova qazaq bıin oryndar І dárejeli laýreat atandy. Sondaı-aq, Aıǵanym artıstik sheberligi úshin dıplommen jáne kýbokpen marapattaldy. Bul - ansambldiń kishi tobynyń alǵashqy sapary jáne birden eki birinshi oryn alyp otyr, bul bizdiń ujym úshin úlken qýanysh», - dep atap kórsetti halyq ansambliniń jetekshisi Saıda Baınahatova.
Baıqaýǵa Tallın, Qazan, Chelıabi, Omby, Sverdlovsk, Volgograd, Hımkı, Saha Respýblıkasynyń óner ujymdary qatysty.
Al eresekter tobynda qazirgi zaman bıi - dýet nomınatsııasynda Venera Baınahatova jáne Gennadıı Sadyqov úzdik atandy.
Elordalyq ansambl atalǵan baıqaýǵa osymen tórtinshi ret qatysyp otyr, jáne úzdik ataný úshin kúrestiń ońaı emes ekenin jaqsy biledi. Osy joly ujymnyń jetekshisi Saıda Baınahatova úzdik qoıýshy-baletmeıster dıplomymen jáne kýbokpen marapattaldy.
