Astananyń azyq-túlik beldeýin qurý jumysy tolyǵymen oryndalmaı otyr - Nazarbaev
ASTANA. QazAqparat - Astananyń azyq-túlik beldeýin qurý jumysy tolyǵymen oryndalǵan joq. Bul týraly búgin EKSPO kórmesine daıyndyq jumystaryn pysyqtaýǵa arnalǵan jıynda QR Prezıdenti Nursultan Nazarbaev málim etti.
«Qala ınfraqurylym qurady, jaqyn oblystar, aldymen Aqmola, Qaraǵandy jáne Qostanaı, Soltústik Qazaqstan oblystary elordalyq naryqqa azyq-túlik jetkizedi dep sheshilgen bolatyn. Qazir ne bar? Byltyr elordada ınflıatsııa 10 protsentke ósken. El boıynsha, ortasha eseppen 8 protsentke jetken. Baǵa ásirese azyq-túlikke ósken. Nege bulaı bolyp jatyr? Saqtaıtyn jerler joq dep aqtalyp jatyr. Maýsym bastalǵanda jetkizý kerek edi. Qalada salynǵan kókónis qoımalary, kommýnaldyq bazar, saýda pavılondarynyń jelileri tolyq kólemde qamtamasyz etilmegen. 8 qoımanyń 2-eýi jumys istemeı tur. Qalǵandary jartylaı jumys istep tur. Sońǵy eki jylda Astanaǵa shetelden 42 mıllıard teńgege azyq-túlik jetkizilgen. Onyń basym bóligin ózimiz, Qazaqstanda shyǵara alatyn taýarlar», - deıdi Nazarbaev.
Aýyl sharýashylyǵy mınıstri Asqar Myrzahmetov Astanada qýaty 90 myń tonna bolatyn qoımalar bar, bul qala qajettiligin tolyq qamtamasyz ete alady. Biraq qoımalar tolyq qýatynda jumys istep turǵan joq.
Elordany azyq-túlikpen qamtý úshin aýyl sharýashylyq kooperatıvteri tartylmaı jatyr, degen Memleket basshysynyń synyna Asqar Myrzahmetov bul másele Úkimettiń kóshpeli otyrysynda qaralǵanyn, jaqyn arada Aqmola, Qaraǵandy, Qostanaı, Soltústik Qazaqstan, Pavlodar oblystaryndaǵy 200 aýyl sharýashylyq kooperatıvteri qosymsha 150 myń tonna sút pen 15 myń tonna et óndire alatynyn habarlady.
Prezıdenttiń sózinshe, aýyl sharýashylyǵy ónimderin óndirýshi kásipkerler taýarlaryn ótkizetin naryq taba almaýda. Al tutynýshy halqy kóp Astanaǵa azyq-túlik qajetti kólemde jetkizilmeýde.
«Meniń oıymsha, tapsyrma oryndalmaı qaldy. Barlyqtaryń oryndaǵan joqsyńdar. Osy isti qalaı túzetetińderińdi qaraımyn taǵy. Premer-Mınıstrdiń orynbasary-Aýyl sharýashylyǵy mınıstri retinde saǵan tapsyrma beremin. Qala basshylyǵymen birge retteńder. Qansha aıta berýge bolady?», - dep qatty eskertti Elbasy.
