Astananyń azyq-túlik beldeýi elordany 20 paıyzǵa qamtamasyz etip otyr - I. Tasmaǵambetov
ASTANA. QazAqparat - Astananyń azyq-túlik beldeýi elordalyqtardyń qajetin 20-22 paıyzǵa qamtamasyz etip otyr. Bul týraly búgin Shyǵys Qazaqstan men Qostanaı oblystarynyń aýyl sharýashylyq ónimderi jármeńkesinde Astana ákimi Imanǵalı Tasmaǵambetov aıtty.
«Astananyń azyq-túlik beldeýi elordany azyq-túlikpen qamtamasyz etýge oń áserin tıgizip kele jatqany sózsiz. Búginde beldeý arqyly elorda halqynyń azyq-túlikke degen qajettiligi 20-22 paıyzǵa qamtamasyz etilýde. Bul kórsetkish jaman emes dep aıtýǵa bolady jáne aldaǵy jyldarda odan da jaqsy nátıjelerge qol jetkizemiz degen josparymyz bar», - dep atap ótti ákim.
Sonymen qatar, qala basshysynyń aıtýynsha, elordada azyq-túlikke degen tapshylyq joq. Jyldan-jylǵa Astananyń elimizdiń basqa óńirlerinen keletin azyq-túlikke táýeldiligi azaıýda. «Eger birneshe jyl buryn bizge ákelinetin azyq-túlik kólemi 72 paıyz bolsa, qazir bul kórsetkish 52 paıyzǵa deıin tómendegen», - deıdi I. Tasmaǵambetov.
Onyń aıtýynsha, qalanyń halqy ósken saıyn, iship-jemge degen suranys ta kóbeıýde. Jyl saıyn elordaǵa 60 myńǵa jýyq adam turǵylyqty turý úshin at basyn tireıdi. Resmı derek boıynsha bas qalada búginde 840 myń adam turady, al resmı emes derekter boıynsha astanalyqtardyń sany 1 mıllıonnan asyp jyǵylady.
«Aıta keteıik, Shyǵys Qazaqstan men Qostanaı oblysytary jármeńkege 1000 tonnadan astam ónim ákeldi. Al Astana halqy kúnine 1800 tonna azyq-túlik tutynady», - dep atap ótti qala basshysy.
