Astananyń aıazynda avtobýstan balany túsirip ketken kim

Esterińizde bolsa, 25 jeltoqsan kúni Aısha Muqasheva Feısbýk arqyly  Astana LRT kompanııasyna júginip, 102 baǵdarynda júretin avtobýsta kólik kartasynda jolaqy tóleýge qarajaty jetpegen balany aıaldamaǵa túsirip ketkendigi týraly jazba qaldyrǵan edi. Osydan keıin bul oqıǵa qoǵamdyq rezonans týǵyzǵan bolatyn.

Dál sol kúni Astana LRT kompanııasy bul máselege oraı pikir bildirip, qazan aıynda barlyq avtopark júrgizýshilerine aıazdy kúnderi balalardy avtobýstan túsirip ketpeý eskertilgendigin habarlady. Sonymen qatar, jazbadaǵy derekter qyzmettik tekserý júrgizýge jetkiliksizdigin atap ótip, avtoryna habarlasýyn ótinedi. Birneshe saǵattan soń jazba avtory baılanysqa shyǵyp,  Astana LRT saýaldaryna jaýap bergen. Sonymen avtobýsta kondýktor bolmaǵan. Bala «Qarlyǵash» balabaqshasy aıaldamasynda avtobýsqa otyryp, «Qarjy ortalyǵy» aıaldamasynan túsken jáne jyly aıaldama pavılonyna kirip, anasyna qońyraý shalǵan.  

«Osydan keıin ýaqyty boıynsha avtobýsty tabý kerek boldy. Aısha Muqasheva saǵat 12-40 pen 13-17-niń arasy dep kórsetti. Atalǵan aıaldama arqyly ótetin barlyq baǵdar qaraldy. Kórsetilgen ýaqyt aralyǵynda 3 júrdek avtobýstyń ótkeni anyqtaldy. Úsh avtobýstyń da salonyndaǵy kameralardan vıdeojazba alyndy. Sonymen qatar, anasy men balasy júrgizýshilermen kezdesti. Atalǵan avtobýstardan alynǵan vıdeojazbalarda bala bolmaı shyqty. Bala da júrgizýshilerdiń bir de birin tanyǵan joq», - dep atap ótti kompanııadan.

Osydan keıin Kóliktik baqylaý departamentiniń ınspektorlary aıaldama pavılonyndaǵy vıdeojazbany aldyrǵan. Sonyń arqasynda bul oqıǵanyń odan erterek oryn alǵany jáne balanyń qandaı avtobýstan túskeni anyqtalǵan. Atalǵan avtobýstyń júrgizýshisi balamen arada eshqandaı janjal bolmaǵanyn aıtqan. Osylaısha, atalǵan jazba avtory ulyna eshqandaı qysym jasalmaǵanyna kóz jetkizgen.

Tekserý qorytyndysy boıynsha Aısha Muqashevanyń atalǵan oqıǵa boıynsha júrgizýshige jáne  Astana LRT kompanııasyna eshqandaı narazylyǵy joq.