Astananyń Avtomobıl joldary men jolaýshylar kóligi basqarmasy Jol polıtsııasy qyzmetkerleriniń usynymdaryna nazar aýdarmaı otyr - prokýratýra
ASTANA. 19 qazan. QazAqparat /Aıdar Ospanalıev/ - Astana qalalyq Avtomobıl joldary men jolaýshylar kólgi basqarmasynyń óz qyzmetin talapqa saı atqara almaǵandyǵyna qaramastan, Jol polıtsııasy qyzmetkerleriniń usynymdaryna nazar aýdarmaı otyr.
Bul týraly búgin Astana qalalyq prokýratýrasynyń Áleýmettik, ekonomıkalyq saladaǵy zańdylyqtardy qadaǵalaý basqarmasynyń prokýrory Sabyrjan Ońalbaev jýrnalıstermen bolǵan brıfıngte málim etti.
Onyń málimetterine qaraǵanda, ótken jyldyń sáýir aıynda basqarmaǵa joldanǵan jyldamdyqty shekteý, basyp ozýǵa tyıym salý, Jol polıtsııasy beketi ornalasqandyǵy jónindegi jol belgilerin ornatý sııaqty birqatar usynymdar áli kúnge deıin oryndalmaǵan.
«Al ótken jyldyń mamyr aıynda G.Aınabekova atty azamatsha kópirden kóligimen túsip kele jatyp, jol jıeginen shyǵyp ketip, jol boıynda ketip bara jatqan júrginshiler jaraqat alǵan. Osy oqıǵadan soń G.Aınabekova oqıǵa bolǵan aımaqta arnaıy belginiń joqtyǵyna shaǵymdanyp, basqarmany sotqa berdi. Al sot isti G.Aınabekovanyń paıdasyna sheship, shaǵymdanýshy memleketten 2 mıllıon teńge óndirip aldy. Sondaı-aq bıylǵy jyldyń maýsymynda Astana qalalyq jol polıtsııasynyń ókilderi jol-kólik oqıǵasynan bolǵan kisi óliminen soń Baýyrjan Momyshuly dańǵylynyń Qordaı kóshesimen qıylysatyn tusynda baǵdarsham qoıý jóninde usynym joldaǵan. Alaıda bunymen baılanysty sharalar áli kúnge deıin qolǵa alynbaǵan. Ókinishtisi mundaı jaǵdaılar biren-saran ǵana emes», - dedi prokýror.
