Astananyń avtobýstary tólemniń elektrondy júıesine qyrkúıekke deıin tolyq kóshiriledi
ASTANA. QazAqparat - Astanada qoǵamdyq avtobýstardy tólemniń elektrondy júıesine 100 paıyzǵa kóshirý aǵymdaǵy jylǵy tamyz aıynyń sońyna josparlanyp otyr, dep habarlaıdy QazAqparat Elorda.info saıtyna silteme jasap.
Qala turǵyny elektrondy kólik kartalaryna arnalǵan valıdatorlar nelikten barlyq baǵyttaǵy avtobýstarda ornatylmaǵany týraly «Astana-ERTs» JShS saıtyna suraq joldaǵan.
Elordalyq azamat termınaldar qalǵan aqshany nelikten qaıtarmaıtynyn suraǵan. Onyń aıtýynsha, aqshany bergen túbirtek boıynsha qaladaǵy jalǵyz oryn - Kenesary, 69 meken jaıynda qaıtaryp alýǵa bolady. Olar tek jumys ýaqytynda isteıtindikten, bul turǵyndar úshin qolaısyz. Onyń ústine, 13.00-den 14.00-ge deıin túski úzilis qarastyrylǵan.
«Jumystan suranyp, aqshany qaıtaryp alý úshin 13.50-de terezeniń aldyna kelip turamyz. Biraq aldymyzdan taǵy bir tosynsyı kútip turady. Aqshany jumys isteıtin 6 terezeniń tek bireýi qaıtarady. Al onyń túski úzilisi 13.00-den 14.30-ǵa deıin. Onymen qosa, ótinish toltyryp, áldebir shot-faktýralarǵa qol qoıý qajet. Protsesti nelikten ońaılatýǵa bolmaıdy nemese onlaın-servıs qurýǵa? Eń ońtaılysy, termınaldar ózderi aqsha qaıtaratyndaı etip jasaý», - dep jazǵan ol.
«Termınaldardyń jumysyna qatysty - qalǵan aqshany qaıtarý qarastyrylǵan, biraq keıde tıyndar taýsylyp qalǵan jaǵdaıda, avtomat out of service rejimine kóshedi.
Qajetti somany berý úshin tıyndar jetispegen jaǵdaıda kredıtti chek berý múmkindigi qarastyrylǵan. Ony qazirgi ýaqytta Kenesary, 69 meken jaıy boıynsha qolma-qol aqshaǵa aýystyrýǵa bolady. Kassa 20 maýsymnan bastap túski úzilissiz isteıdi, al 1 shildeden bastap onyń jumysy 19.00-ge deıin uzartylatyn bolady», - dep jaýap qaıyrylǵan «Astana-ERTs» saıtynda.
