Astananyń avtobýs júrgizýshileri jyl basynan beri Jolda júrý erejelerin 3 628 ret buzdy - I.Tasmaǵambetov
TANA. 22 qarasha. QazAqparat /Gúlmıra Alıakparova/ - Astananyń jolaýshylar avtobýstarynyń júrgizýshileri jyl basynan beri Jolda júrý erejelerin 3 628 ret buzdy.
Bul týraly óziniń jeke blogynda turǵyndardyń suraǵyna jaýap bere kele qala ákimi Imanǵalı Tasmaǵambetov aıtty.
Elorda turǵyny ákimge, keıbir qoǵamdyq kólikterdegi júrgizýshilerdiń avtobýsty basqarýdaǵy mádenıetsizdigine, olardyń elorda mártebesine sáıkes kelmeıtin kıim-kıisine, túr-tulǵasyna jáne jolaýshylarǵa kórsetetin turpaıy minez-qulqyna qatysty shaǵymdandy.
Oǵan qala basshysy, jolaýshylar kóliginde qyzmet kórsetýdiń sapasyn jaqsartý boıynsha sharalar udaıy qolǵa alynyp otyratynyn jáne jaqynda ǵana ózine júktelgen mindetti tıisinshe oryndamaǵan №2 avtoparkpen kelisimdi buzý týraly sheshim qabyldanǵanyn aıtty.
«Jyl basynan beri Astana qalasynyń Jol polıtsııasy basqarmasynyń qyzmetkerleri avtoparkter júrgizýshileriniń qatysýymen bolǵan Jolda júrý erejesiniń 3 628 buzýshylyǵyn anyqtady. Sonyń ishinde iri buzýshylyqtardy №2 avtoparktyń ókilderi jasady. Onymen qosa, atalmysh kásiporynnyń basshylyǵy jyljymaly quramdy jańartý boıynsha bizdiń talabymyzdy birneshe jyldar boıy oryndamaı keldi», - dedi I.Tasmaǵambetov.
Sondaı-aq ákim atap kórsetkendeı, qazirgi ýaqytta №1 avtopark pen «Jorǵa» JShS Jolaýshylar kóligi jáne avtomobıl joldary basqarmasynyń jiti qadaǵalaýynda tur. Eger ózderine júktelgen mindetterdi oryndamasa, olar da Astanada jumys isteý quqyǵynan aıyrylatyn bolady.
2011 jyl bastalǵaly 180 júrgizýshi men 500 kondýktor jumystan shyǵarylyp qana qoımaı, elordada atalmysh salada jumys isteý quqyǵynan da aıyryldy.
