Astananyń avtobýs jolaqtarynda kólik apattary kóp boldy ma
Aıta keteıik, qalanyń kólik keshenin damytý baǵdarlamasy aıasynda 2015 jyly 6 kóshede avtobýs jolaǵy engizilse, ótken jyly 5 kóshede «BUS Line» syzyldy.
«Qala kóshelerinde «BUS Line» jolaǵy engizilgennen beri (2015 jyldan bastap) qoǵamdyq kólikter 9 jol-kólik apatyna tústi. 6 ret jaıaý júrginshilerdi soǵyp ketse, 3 márte kólik qaqtyǵysty. Jaıaý júrginshilerdi soǵyp ketý kezinde 3 adam qaıtys boldy», - delingen Ákimshilik polıtsııanyń QazAqparat tilshisine bergen resmı jaýabynda.
Aldaǵy ýaqytta Astananyń 24 kóshesinde avtobýs jolaqtaryn engizý josparlanǵan. Atap aıtqanda, Jeńis dańǵyly (Konstıtýtsııa kóshesinen Kenesary kóshesine deıingi aralyq), Respýblıka dańǵyly (Abaı - Baraev), Táýelsizdik dańǵyly (Pýshkın - Momyshuly), Qabanbaı dańǵyly (Qorǵaljyn tas jolynan aınalma jolǵa deıin), Abylaı han dańǵyly (Qoshqarbaev - Pýshkın), Shákárim Qudaıberdiuly (Qoshqarbaev - Pýshkın), Saraıshyq kóshesi (Qabanbaı batyr - Momyshuly), Baıtursynov kóshesi (Momyshuly - jańa vokzal), Nájimedenov kóshesi (Qaldaıaqov - jańa vokzal), Syǵanaq kóshesi (Aıtmatov - Turan), Saryarqa dańǵyly (Seıfýllın - kópirge deıin), Turan dańǵyly (kópir - Dostyq kóshesi), Qosshyǵuly kóshesi (2 Almaty kóshesi - Oral kóshesi), Máńgilik el (jol aıryqtan bastap Kereı men Jánibek handar kóshesine deıingi aralyq), Pýshkın kóshesi («A-Madı» janar-jaǵarmaı quıý stansasy - Jetigen kóshesi), Sátbaev kóshesi (Momyshuly - Petrov), Beıbitshilik kóshesi (Esenberlın - Seıfýllın), Gete («Saparjaı» avtovokzaly - Respýblıka dańǵyly), Aqjol (Pýshkın - Alash tas joly), Jumabaev kóshesi (Qajymuqan - Qoshqarbaev), Qoshqarbaev (Táýelsizdik - Túlebaev), Qonaev dańǵyly (Máńgilik el - Turan), Dostyq kóshesi (Máńgilik el - Turan) jáne Konstıtýtsııa kóshesinde (Báıseıitova - Jeńis aralyǵynda) avtobýs jolaqtaryn engizý kózdelgen.
