Astananyń áýejaıynda jalǵan tólqujattarmen Germanııaǵa ushpaqshy bolǵan 6 aýǵandyq azamat ustaldy
ASTANA. 21 mamyr. QazAqparat - 2012 jyldyń 18 mamyrynda «Astana» halyqaralyq áýejaıynyń «Astana-Frankfýrt» reısindegi tólqujat baqylaýy kezinde QR Ulttyq qaýipsizdik komıteti shekaralyq qyzmetiniń «Astana» shekarashy áskerı qyzmetkerleri Aýǵanstan Islam Respýblıkasynyń alty azamatyn ustady.
Aýǵandyq azamattar Qyrǵyz Respýblıkasynyń jalǵan qujattary boıynsha memlekettik shekaradan ótpekshi bolǵan. Budan basqa, tólqujattarda Eýropalyq Odaq elderiniń aýmaǵyna kirýge, turýǵa jáne júrýge quqyq beretin Shengen aýmaǵynyń jalǵan vızalary boldy.
Anyqtalǵandaı, olar jalǵan tólqujattar arqyly Germanııaǵa ushpaqshy bolyp, onyń aýmaǵynda bosqyndar mártebesin alýdy maqsat etken.
Qazirgi ýaqytta ustalǵan sheteldik azamattarǵa qatysty tergeý aldyndaǵy tekseris ótkizilýde.
