Astananyń aýdan ákimderi «Jańa Adamdarǵa» esep beretin boldy

ASTANA. QazAqparat - Astana qalasynyń ákimi «Jańa Adamdar» qozǵalysynyń ókilderimen kezdesip, ákimdik qyzmetshilerine jastar kóterip júrgen máselelerdi sheshý jóninde naqty tapsyrmalar berdi, dep habarlaıdy QazAqparat tilshisi.

Astana qalasyndaǵy áleýmettik máselelerdi kóterip júrgen «Jańa Adamdar» jastar qozǵalysynyń ókilderi elorda basshysy Jeńis Qasymbekpen kezdesti. Kezdesýde qaladaǵy jaıaý júrginshige arnalǵan soqpaqtardyń sapasy syn kótermeıtini aıtyldy. Buǵan deıin qozǵalys belsendileri ákimdikke ótkizgen qaýipti trotýarlardyń tizimi qala kóshelerin jóndeý jumystarynyń josparyna enetin boldy. Astana qalasy ákiminiń bas orynbasary Nurlan Nurkenov atalǵan kemshilikti joıý úshin bıýdjetten aqsha bólýge ýáde berdi.

Sondaı-aq, elorda aýdandarynyń ákimderi «Jańa adamdar» qozǵalysyna apta saıyn tóselgen pandýstar men trotýarlardyń qalaı jóndelip jatqany týraly esep berip otyratyn boldy.

«Seń qozǵaldy deýge bolady. Biraq biz buǵan qanaǵattanyp, toqtap qalmaımyz. Qalada áli de kóptegen máseleler bar. Biz kótergen másele turǵyndar ún qosqanda ǵana nátıje bolatynyn kórdik. Ári qaraı da Astananyń qurylys máselelerimen aınalysa beremiz. Barsha astanalyqtardy ortaq problemalardy birlesip sheshýge qatysýǵa shaqyramyn. Jańa Qazaqstan el ishinde ortaq janashyrlyq, uıymdasqan áreket arqyly ǵana ornaıdy», - deıdi qozǵalys belsendisi Arlen Tańatuly.

Buǵan deıin áleýmettik saýalnamaǵa qatysqan astanalyqtardyń 90 paıyzy trotýarlardyń sapasyna shaǵym aıtqanyn jazǵan bolatynbyz.