Astananyń aýa raıy salqyn bolǵanymen, halyqtyń yqylasy ystyq - Kolýmbııa delegatsııasynyń jetekshisi
ASTANA. QazAqparat - «Astananyń aýa raıy qońyr salqyn bolǵanymen, halqynyń yqylasy ystyq». Mundaı pikirdi QazAqparat tilshisine fızıkadan ótken 45-shi Halyqaralyq olımpıadaǵa Kolýmbııa delegatsııasyn bastap kelgen Fernando Vega Sala aıtty.
«Sońǵy kúnderi bultty, jeldi bolǵan Astana aýa-raıyna qatysty kópshiligi tabıǵattyń qataldyǵyn aıtyp jatyr. Ásirese, tropıkalyq elden kelgen qonaqtar muny birden baıqady, sonyń ishinde kolýmbııalyqtar da bar. Biraq, sizdiń halyqtyń qonaqjaılylyǵyndaı asqan ystyq yqylasty kórgenimz joq. Sizdiń halyq ashyq jarqyn kóńilimen erekshe eken. Biz dán rızamyz», - dedi Kolýmbııa delegatsııasynyń jetekshisi.
Sonymen qatar, ol Astananyń sáýletti ǵımarattaryna tańdanysyn jasyra almady. «Sizder jańa qala salǵansyzdar, bul qurmet tutýǵa laıyq», - dedi qonaq óz sózinde. Esterińizge sala keteıik, 20 shildede Beıbitshilik jáne kelisim saraıynda fızıkadan ótken 45-shi Halyqaralyq olımpıadanyń jabylý saltanaty ótti. Dúbirli dodada Qazaqstan quramasy 8 orynǵa turaqtady. Qazaqstandyq qatysýshylar 3 altyn (Amır Bralın, Nurıslam Tursynbek, Isa Danat), 2 kúmis (Dáýlet Qurmantaev, Nurbek Dinmuhammed) enshiledi. Jalpykomandalyq esepte Qytaı, Taıvan, Ońtústik Koreıa júldeli oryndardan kórindi.
