Astananyń arnaıy orta bilim beretin oqý oryndary taǵy bir jańa kolledjben tolyqty
ASTANA. Shildeniń 23-i. QazAqparat /Gúlmıra Álıakparova/ - Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń bazasynda kolledj ashyldy. Ashylǵanyna 10 kún bolǵan kolledj alǵashqy qatysýshylaryn qarqyndy qabyldaý ústinde.
«Astana qalasy Bilim basqarmasy» memlekettik mekemesiniń ústimizdegi jylǵy shildeniń 13-i kúngi №468-shi buıryǵyna sáıkes, S.Seıfýllın atyndaǵy QazATÝ-ǵa tehnıkalyq, kásiptik jáne orta bilimnen keıingi bilim berý qyzmetin júzege asyrýǵa AB №0129867 lıtsenzııasy berildi.
Jańa kolledj bilim berýdi 9 mamandyq boıynsha júzege asyrmaq: kásiptik oqytý; esep jáne aýdıt; standarttaý, metrologııa, jáne sertıfıkattaý; elektrmen jabdyqtaý; agronomııa; orman sharýashylyǵy, baq-saıabaq jáne landshafty qurylystar; aýyl sharýashylyǵyn mehanıkalandyrý; zootehnııa jáne veterınarııa.
2010-2011 oqý jylyna bilim ordasy 9 jáne 11 synyptardy aıaqtaǵan 230-ǵa jýyq abıtýrıentti qabyldaýdy josparlap otyr. Aıta keteıik, Ulttyq biryńǵaı testileýdi nemese keshendi testileýdi tapsyrǵan, biraq 50 ball jınaı almaǵan 11-shi synyp túlekteri emtıhansyz qabyldanady.
QazATÝ-dyń birinshi prorektory Aıtjan Ábdirovtyń aıtýynsha, lıtsenzııa kesh berilgendikten, kolledj memlekettik granttardyń úlestirilýine keshigip qalǵan. Sondyqtan bıylǵy oqý jylyna abıtýrıentter tek aqyly negizge qabyldanady.
«Memlekettik joǵary oqý ornynyń bazasynda kolledjdi ashýdaǵy basty maqsat - bilim qýǵan aýyl jastaryna qol ushyn berý. Sebebi, jyl saıyn kóptegen aýyl jastary Ulttyq biryńǵaı testileý boıynsha qajetti upaılardy jınaı almaı, elderine oralyp jatady. Bul usynysty ýnıversıtettiń professorlyq-oqytýshylyq quramyna aýyldarda júrgizilgen kásiptik baǵdarlaý sharalary kezinde, aýyl jastary men olardyń ata-analary bildirgen bolatyn. Al baspanaǵa muqtaj jastardyń máselesin ońtaıly sheshý úshin jataqhanadan oryndar berýdi qarastyryp otyrmyz», - deıdi ol.
A.Ábdirov atap kórsetkendeı, kolledjde oqytylatyn mamandyqtar, Qazaq agrotehnıkalyq ýnıversıtetiniń mamandyqtaryna ádeıi sáıkestendirilip tańdap alynǵan. Mysalǵa, 11-shi synypqa oqýǵa túsken jas, kolledjde 1 jyl 10 aı oqıdy, odan keıin eshqandaı emtıhan tapsyrmaı-aq ýnıversıtetke qabyldanyp, 2,5-3 jyl bilim alady. Sonymen birge olarǵa oqý aqysyn tóleýde jeńildikter beriledi.
Kolledj dırektorynyń mindetin atqarýshy bolyp veterınarııa ǵylymdarynyń kandıdaty Saǵyndyq Áshimov taǵaıyndaldy.
