Astananyń Almaty jáne Saryarqa aýdandaryna jańa ákimder taǵaıyndaldy
Bul týraly qala ákimdiginiń baspasóz qyzmetinen habarlandy.
Máslıhat qaýlysyna sáıkes, Astana qalasynyń Almaty aýdanynyń jańa ákimi bolyp 40 jastaǵy Bekbol Saǵyn taǵaıyndaldy. «Kandıdat týraly jaqsy bilesizder, artyq tanystyrýdy qajet etpeıdi dep oılaımyn. Ol bizdiń qalanyń qarjy júıesinde uzaq jyldar qyzmet etti, sondaı-aq basshylyq qyzmette úlken tájirıbe jınaqtady. Ol qalanyń jumys erekshelikteri sekildi aýdandardyń deńgeıindegi jumystardy da jaqsy biledi. Buryndary Aqtóbe qalasy ákiminiń orynbasary bolǵan, áleýmettik salada jaýapty qyzmetter atqarǵan. Barlyq laýazymdarda ózin jaqsy jaǵynan kórsetip, bizdiń barshamyzdyń aldymyzda turǵan mindetterdi sheshýge qatysty ujym jumysyn jaqsy jolǵa qoıa biledi», - dedi Astana qalasynyń ákimi Imanǵalı Tasmaǵambetov máslıhat depýtattaryna jańa ákimniń kandıdatýrasyn usyný barysynda.
Budan bólek, Astana qalasy Saryarqa aýdanynyń ákimi bolyp Ermaǵanbet Bólekpaev taǵaıyndaldy. Ol 37 jasta. «Túrli qyzmette kóptegen tájirıbesi bar, onyń ishinde kommertsııa salasynda qyzmet etti, odan keıin uzaq jyldar boıy Memlekettik qyzmet isteri agenttiginde jumys istedi. Qaraǵandy jáne Ońtústik Qazaqstan oblysynyń aýmaqtyq basqarmalarynda basshylyq qyzmetterdi jaqsy atqardy. Pavlodar oblysynda Pavlodar aýdanynyń ákimi boldy», - dedi qala basshysy.
Toqtala keteıik, Bekbol Saǵyn buǵan deıin Astana qalasy ekonomıka jáne bıýdjettik josparlaý basqarmasynyń basshysy bolǵan.
Ermaǵanbet Bólekpaev Memlekettik qyzmet isteri agenttiginiń basqarma basshysy-Astana qalasy boıynsha tártiptik keńestiń tóraǵasy qyzmetterin atqarǵan.
Budan bólek, I. Tasmaǵambetovtyń aıtýynsha, buǵan deıin Astana qalasy Almaty aýdanynyń ákimi bolǵan Pavel Kýlagın endi qalalyq kommýnaldyq qyzmet basqarmasyna basshy bolady. Al Saryarqa aýdanynyń burynǵy ákimi Ermek Ospanov Astana qalasy eńbek ınspektsııasy basqarmasynyń basshysy qyzmetine taǵaıyndaldy.
