Astananyń Almaty aýdanynda 338 avtokóligi bar 11 taksopark jumys isteıdi
ASTANA. 5 aqpan. QazAqparat - Almaty aýdanynda turǵyndar men qala qonaqtaryn tasymaldaýmen 338 avtokóligi bar 11 taksopark aınalysady.
Bul týraly elordanyń resmı Astana.kz saıtyna Almaty aýdany ákimdiginen habarlandy.
Baspasóz habarlamasyna qaraǵanda, 2012 jyly aýdan turǵyndarynyń suranysy boıynsha avtobýs baǵdarlarynyń júıesin ońtaılandyrý jumystary da júzege asyrylǵan. Atap aıtqanda, №3, 33, 34 avtobýstardyń baǵdarlary uzartylyp, jańa ákimshilik aımaq pen «Master-2» saýda úıi aralyǵynda qatynaıtyn №50 jańa avtobýs baǵdary iske qosyldy. №3, 28, 41 avtobýs baǵdarlarynyń sany artty. Ákimdiktiń málimetine sáıkes, aýdanda «Astanatelekom» qalalyq telekommýnıkatsııa jelilerinde 110 402 telefon nómirin qamtıtyn túrli modıfıkatsııaly 3 telefon stansasy, 109 abonenttik baılanys orny, 2 radıo júıesi jáne 7 bazalyq stansa qyzmet etedi.
«Jyl ishinde, «Astanatelekom» qalalyq telekommýnıkatsııa ortalyǵy Abylaı han dańǵyly men Jastar shaǵyn aýdanynda ornalasqan 18 turǵyn úıge telefon jelisin júrgizip, 15 myń nómir ornatty. 12 mektep ınternet jelisine qosyldy», - delingen habarlamada.
