Astananyń Áleýmettik beıimdelý ortalyǵyna 30 úısiz adam jiberildi
ASTANA. QazAqparat - Aýa temperatýrasynyń kúrt tómendeýine baılanysty elordalyq polıtseıler Áleýmettik beıimdelý ortalyǵymen birlesip belgili bir mekenjaıy joq adamdarǵa kómek kórsetý sharasyn kúsheıtti, dep habarlaıdy «QazAqparat» HAA qalalyq ІІD baspasóz qyzmetine silteme jasap.
Bir táýlikte osy sanattaǵy 30 azamat Astananyń áleýmettik beıimdelý ortalyǵyna jiberildi. Sondaı-aq, polıtseıler olardyń týystaryn izdeý jumystaryn júrgizip jatyr.
Polıtseılerdiń aıazdy kúnderdegi taǵy bir mindeti - úsik shalý jaǵdaılary týraly jáne bolýy múmkin qaıǵyly saldar týraly eskertý. Budan bólek, polıtseıler naqty mekenjaıy joq jáne qujattary joq azamattardy ІІD qabyldaý-bólýge jiberý jumystaryn júrgizip jatyr, dep atap ótti baspasóz qyzmetinde.
Eske salaıyq, Astanany 40 gradýstan asatyn qatty aıaz býyp tur. Aıaz bastalǵaly 28 adamnyń úsik shalyp, dárigerlerge kelgeni belgili boldy.
