Astananyń álemniń qarjylyq-tehnıkalyq ortalyǵyna aınalý múmkindigi zor - BUU ESKATO sarapshylary
Kezdesýde AHQO men ESKATO ókilderi shaǵyn jáne orta ınnovatsııalyq bızneske qoldaý kórsetý jáne aımaqtaǵy, onyń ishinde AHQO platformasyndaǵy ESKATO-nyń birqatar jobalaryn júzege asyrý máselelerin talqylady.
ESKATO ókili, Fung Group bas keńesshisi jáne tsıfrly ekonomıka boıynsha ESBN Gonkong pen Taılandtaǵy ókili Barbara Meınert Qazaqstan astanasynda bolashaqta qarjylyq sektordaǵy jańa tehnologııalardy belsendi engizýge bolatynyn atap ótti. Onyń aıtýynsha, elorda osy saladaǵy álemdik kóshbasshylardyń birine aınalatyn múmkindikterge ıe.
«Bul qarjylyq saladaǵy tsıfrlyq jobalardy kórsetetin tehnologııalyq noý-haýlar. Meniń oıymsha, Astana halyqaralyq qarjy ortalyǵy az ýaqytta álem qaýymdastyǵynyń nazaryn aýdaryp úlgerdi, sondaı-aq bul uıym ári qaraı da damı beredi. AHQO-nyń álemniń qarjylyq-tehnıkalyq astanasy, halyqaralyq qarjylyq tehnologııalar ortalyǵy bolatyndaı áleýeti bar. Jobamyzdy tabysty júzege asýy úshin jáne Ortalyqtaǵy jobaǵa ózge de dostarymyz ben áriptesterimizdi tartý úshin AHQO-men tyǵyz yntymaqtastyqta bolamyz degen úmittemin», - dedi Barbara Meınert.
Onyń aıtýynsha, Astana ortalyǵynyń basty ereksheligi - ashyqtyǵy jáne burynǵy júıeniń aýyrtpalyǵynan azat ekendigi. Óıtkeni, munda qazirgi zamandaǵy barlyq oı-pikirler ashyq taldanady. Osynyń arqasynda jańa ıdeıalar kelip, sandyq tehnologııalar salasynda jańa jobalar qurylýda.
Óz kezeginde «Astana» halyqaralyq qarjy ortalyǵynyń basqarýshysy Qaırat Kelimbetov ortalyqtyń jumysy týraly baıandap, aldaǵy josparlarymen bólisti.
«AHQO resmı túrde 2018 jyly ashylady, biraq 2015 jyldan beri daıyndyq jumystaryn júrgizip kelemiz. Ortalyqtyń tolyqqandy jumys isteýi úshin Konstıtýtsııaǵa sáıkes túzetýler engizildi. Bul postkeńestik aýmaqtaǵy jumys ustanymy aǵylshyn zańyna negizdelgen jalǵyz qarjy ortalyǵy. Qazirgi ýaqytta «NASDAQ» amerıkalyq bırjasymen jáne «SHANGHAI STOCK EXCHANGE» Shanhaı qor bırjasymen birlesip, ózimizdiń qor bırjamyzdy qurýdamyz», - dedi ol.
Sondaı-aq, AHQO basshysy qarjylyq ortalyq jumysynyń úsh negizgi baǵytyn atap ótti. Onyń birinshisi - Ortalyq Azııadaǵy jumys.
"Qazaqstan Ortalyq Azııanyń 50 paıyzyn alyp jatyr jáne munda munaı-gaz, metallýrgııa, kómir óndirisi jaqsy damyǵan. Jer aýmaǵynyń úlkendigi de bizdiń artyqshylyǵymyz. Ekinshi baǵyty - Eýrazııalyq ekonomıkalyq odaq aıasynda reseılik, belarýs jáne armenııalyq seriktestermen jumys isteý. Odaq aýmaǵynda 170 mıllıon halyq turady, ıaǵnı bul úlken naryq. Úshinshi baǵyt - Jibek joly ekonomıkalyq beldeýi. Qazaqstan bul ıdeıaǵa qoldaý bildirgen alǵashqy el jáne atalǵan baǵytta bizdiń kóshbasshylarymyz (Nursultan Nazarbaev pen Sı Tsıznpın - red.) birneshe kezdesý ótkizdi. Qytaı da óńirlik qarjylyq hab úshin óte mańyzdy memleket», - dep atap ótti Kelimbetov.
AHQO men ESKATO «jasyl» bıznes, tsıfrlyq ekonomıka, bank isi, qarjy salasy boıynsha tyǵyz yntymaqtastyqta jumys isteýdi josparlap otyr. ESKATO aımaqtaǵy úkimetterge keńes berý, kadr daıyndaýǵa yqpaldastyq kórsetý, ekonomıkalyq-áleýmettik jaǵdaıdy jaqsartýǵa arnalǵan baǵdarlamalardy júzege asyrýmen aınalysady. Sonymen birge, bul uıym ekonomıkalyq jáne áleýmettik tendentsııalardy taldaýda úlken tájirbıege ıe jáne aımaqtaǵy elderdegi ınnovatsııalyq ortany damytýda belsendi jumys isteıdi.
Aıta keteıik, Azııa men Tynyq muhıty boıynsha ekonomıkalyq jáne áleýmettik komıssııa 1947 jyly qurylǵan. Uıym aımaqtaǵy ekonomıkalyq jáne áleýmettik máselelermen aınalysady. Onyń negizgi jobalary aımaqaralyq saýda men ınvestıtsııalar, tehnologııalarmen bólisý, jekeshelendirý, kásipkerlik, qorshaǵan ortany qorǵaý, kedeıshiliktiń deńgeıin azaıtý, álýemettik damý jumys kúshteriniń mıgratsııasy, esirtkimen kúres salalary boıynsha júzege asyrylýda.
