Astananyń aqyldy balalary «Trıýmf» balyna qatysty
ASTANA. QazAqparat - Búgin Astanada Oqýshylar saraıynda daryndy balalarǵa arnalǵan «Trıýmf» baly ótti. Osymen úshinshi ret uıymdastyrylyp otyrǵan saltanatty sharaǵa 2013-2014 jylǵy halyqaralyq, respýblıkalyq olımpıadalar men ǵylymı jobalar baıqaýynyń shamamen 230 jeńimpazy men júldegerleri, astanalyq bilim mekemeleriniń 9-11 synyp oqshylary qatysty.
Oqý jylynyń qorytyndysy boıynsha 362 oqýshy AQSh, Brazılııa, Gollandııa, Grýzııa, Indonezııa, Reseı, Túrkııa, Qytaı, Kıpr, Koreıa jáne Úndistan sııaqty álemniń birqatar elinde ótken halyqaralyq olımpıadalarǵa qatysyp, 234 medalǵa ıe bolǵan. Sondaı-aq elordanyń oqýshylar komandasy 7 jyl qatarynan úzdik atanyp keledi. Saltanatty balda aq tústi keshki bal kóılegindegi arýlar men smokıng kıgen bozbalalardan quralǵan 75 jup vals yrǵaǵynda terbeldi. Bal barysynda olımpıadalardan birnesh márte júlde ákelgen oqýshylardyń eńbekteri eskerilip, 16 oqýshyǵa «Topjarǵan» nomınatsııasy boıynsha altyn juldyzshalar berildi. Qadirli qonaqtar retinde balǵa QR Parlamenti men Astana qalasy máslıhat depýtattary, QR Bilim jáne ǵylym mınıstrliginiń, elordalyq ákimdik ókilderi shaqyryldy.
