Astananyń ákimi xalyqty qabyldaýdyń jańa úlgisin engizdi
ASTANA. QazAqparat - Búginnen bastap elorda ákimdigi xalyqty qabyldaýdyń jańa formatyna aýysty, dep xabarlaıdy QazAqparat tilshisi.
Buryn qala turǵyndary men qonaqtary qandaı bir másele boıynsha ákimdikke barǵanda aldymen ruqsat bıýrosyna baryp, smartfon men planshetterin arnaıy uıashyqtarǵa tastap ketetin. Sodan keıin ǵımaratqa kirip, basqarmalardyń kabınetterin izdese, endi barlyq basqarmalardyń ókilderi birinshi qabatta otyryp, xalyqtyń aryz-shaǵymdaryn qabyldaıtyn bolady. Osylaısha, ákimdik qurylymdary xalyqqa qyzmet kórsetý ortalyqtary úlgisinde jumys isteýge kiristi.
«Osyǵan baılanysty ákimdiktiń holynda arnaıy tynyǵý alańy ashyldy. Ol jerde teledıdar men sý ishetin oryn bar. Birinshi qabatta uıaly telefon men planshetterdi emin-erkin qoldanýǵa bolady. Sondaı-aq ulttyq kıim kıgen úsh qyzmetker eki tilde barlyq suraqtarǵa jaýap bere alady. Olar qajetti aqparatty berip, azamattardy basqarmalarǵa jiberetin bolady», - deıdi Astana ákimi baspasóz qyzmetiniń jetekshisi Elvıra Júrgenbaeva.
