Astananyń 800-den astam turǵyny densaýlyq marafonyna qatysty (FOTO)
ASTANA. QazAqparat - Búgin Astana qalasy ákimdigi aldyndaǵy alańǵa 700 metrlik densaýlyq marafonyn júgirip ótý úshin 800-den astam elordalyq turǵyn jıyldy, dep habarlaıdy astana.kz.
Sporttyq sharaǵa belgili sportshylar, qoǵam qaıratkerleri, sonymen qatar tilek bildirgen turǵyndar qatysty. Shara elorda ákimdigimen uıymdastyryldy. Marafon bastalmas buryn qatysýshylarǵa Astana qalasy ákimdigi bekitken QR Prezıdenti saılaýynyń resmı sımvolıkasy beınelengen beısbolkalar men fýtbolkalar taratyldy. Júgirý Kenesary kóshesinen bastalyp, Q.Muńaıtpasov atyndaǵy sport kesheninde aıaqtaldy. Sharanyń saltanatty ashylýynda sóz sóılegen Olımpıada chempıony Vladımır Smırnov barlyq qatysýshylarǵa izgi tilekterin joldady. - Bizder óz densaýlyǵymyzǵa muqııat bolýymyz qajet. Densaýlyq - halyqtyń baılyǵy men eń úlken jetistigi. Barlyqtaryńyzǵa sáttilik tileımin, baqytty jáne qýatty bolyńyzdar, - dedi ol. Sondaı-aq marafonǵa kelgen qalamyzdyń qart turǵyndarynyń biri, UOS ardageri Fedor Marın sharaǵa qatysýshylardyń kóptigine tań qalǵanyn jasyrmady. - Qatysýshylarǵa sporttyń bıikterin baǵyndyrýdy tileımin. Bilimniń shyńyna shyǵýlaryna tilektespin. Árdaıym osyndaı kórikti bolyp júrińizder, - degen júrekjardy tilegin bildirdi ardaqty ardager. Barlyq jyly tilekterden keıin marafon qatysýshylary aspanǵa 500 shar ushyrdy.
