Astananyń 60 kóshesi men 15 mektebine jańa ataý berý usynystary daıyn tur
«Astana qalasynda 1 168 quramdas bólik bar, onyń ishinde 17 dańǵyl, 4 tas jol jáne 1 110 kóshe tirkelgen. Basym kópshiliginiń ataýy 1997 jyldan beri aýysyp keledi, ıaǵnı respýblıka boıynsha Astana aldyńǵy qatarda tur. Bul ataýlar ózimizdiń uly tulǵalarymyz ben tarıhı jer-sý attary qurmetine qoıylǵan. Ákimdik janynan Májilis pen máslıhat depýtattary, qoǵamdyq keńes músheleri, tarıhshy ǵalymdar, memleket qaıratkerleri, memlekettik organ ókilderinen qalalyq onomastıka komıssııasy qurylǵan. Osy komıssııada ataý berý máselesi sheshimin tabady», - dedi Á. Moldabaeva Astana kommýnıkatsııalar qyzmetinde ótken brıfıngte.
Onyń aıtýynsha, jyl basynan beri 9 jobalyq kóshege, 1 alań, 1 jańadan ashylǵan aýdanǵa ataý berilip, eki kóshe qaıta ataldy.
Qala kóshelerine tarıhtaǵy asa kórnekti qolbasshy Beıbarys sultan, Ekinshi dúnıejúzilik soǵys jaýyngeri, bilikti jýrnalıst, prozashy Ásken Nábıevtiń, balalar ádebıetiniń kórnekti ókili, klassık jazýshy Berdibek Soqpaqbaevtyń, áıgili akademık, energetık-ǵalym, Ulttyq ǵylym akademııasynyń akademıgi Shapyq Shókınniń esimderi berilgen.
«Byltyr 41 quramdas bólikke ataý berilip, qaıta atalǵan. Onyń ishinde Qazaqstanyń belgili qaıratkerleri Oral Muhamedjanov, Safýan Sháımerdenov, Dúkenbaı Dosjan, Erkeǵalı Rahmadıev syndy tulǵalardyń esimderi, Bozoq, Botaı, Túımekent syndy jer-sý attary da berilgen. Sondaı-aq, halyqaralyq qarym-qatynasty nyǵaıtý maqsatynda elorda kósheleriniń birine Ázerbaıjan Respýblıkasynyń prezıdenti bolǵan Geıdar Álıevtiń esimi, jańa alańǵa – «BUU alańy» ataýy berildi», - dedi spıker.
Elordada jańa ataý berilgen 44 bilim jáne mádenıet mekemeleri bar. Atap aıtqanda, sońǵy jyldary bul mekemelerge Ózbekáli Jánibekov, Qoshke Kemeńgeruly, Kemal Aqyshev, Roza Baǵlanova, Ybyraı Altynsarın, Dinmuhamed Qonaev, Farıza Ońǵarsynova esimderi berildi.
Qazirgi tańda alpystan astam kóshege, 15-ke jýyq mektepke jańa ataý berý týraly usynystar daıyn tur. Bul usynystar aldaǵy ýaqytta ótetin komıssııa otyrysyna engiziledi.
