Astananyń 60 kishkentaı hanshaıymy «Juldyz» ataný úshin ózara saıysqa túsedi
ASTANA. 25 qazan. QazAqparat - 30 qazanda Astanadaǵy Oqýshylar saraıynda «Kishkentaı juldyz» atty qalalyq baıqaý ótedi.
Oǵan 6-7 jáne 8-10 jas aralyǵyndaǵy qyzdar qatysady.
Baıqaýdy uıymdastyrýdaǵy maqsat - kishkentaı qatysýshylardyń boıyndaǵy ónerin shyńdap, talantyn ashý, jeke stıldi qalyptastyrýǵa, sahna ústinde, foto jáne vıdeo obektıv aldynda ózin durys ustaı bilýge úıretý.
Kishkentaı hanshaıymdar án, bı, qolóner jáne defıle syndy kezeńder boıynsha saıysqa túsetin bolady. Alǵashynda baıqaýǵa 60 úmitker qatystyrylady, olardyń arasynan iriktelgen 20 «kishkentaı juldyz» kelesi kezeńderge ótedi. Onda baıqaýshylar ózin-ózi tanystyrý, kishkentaı arýdyń qolóneri (sýret salý, qolóner, músin jáne t.b), sán úlgisin kórsetý sekildi kezeńderden ótedi. Jas ereksheligine qaraı «Kishkentaı Juldyz-2012», «Súıkimdi úlgi-2012», «Altyn saýsaqtar-2012», «Kórermenniń kózaıymy» atty atalymdar belgilenedi. Bas júlde ıegerleri erekshe syılyqtarmen, Oqýshylar saraıynyń dıplomymen marapattalady.
