Astananyń 4 aýdanyna 40 jyly aıaldama satyp alynady
NUR-SULTAN. QazAqparat – Nur-Sultan qalasynyń qoǵamdyq keńesi shahardyń bıylǵa naqtylanǵan bıýdjet jobasyn talqylady, dep habarlaıdy QazAqparat tilshisi.
Astananyń bıylǵa naqtylanǵan bıýdjet jobasyn qoǵamdyq keńes múshelerine Nur-Sultan qalasynyń ekonomıka jáne bıýdjettik josparlaý basqarmasynyń basshysy Qaısar Mańqaraev tanystyrdy.
«Kólik jáne jol-kólik ınfraqurylymyn damytý basqarmasyna Táýelsizdik kópiriniń qurylysyna, «Ońtústik-Shyǵys» shaǵyn aýdany kósheleriniń qurylysyn jalǵastyrýǵa, «Internatsıonalnyı» turǵyn alabyndaǵy mekemelik jeliler men joldarǵa, №27 kósheniń boıynda Esil ózeni arqyly ótetin kópir salýǵa, jolaýshylar tasymaly boıynsha mindettemelerdi sýbsıdııalaýǵa, 4 aýdan úshin 40 jyly aıaldama satyp alýǵa bıýdjet ákimshiligi baǵdarlamasy arqyly 10 mlrd 200 mln teńge bólý usynylyp otyr», - dedi basqarma basshysy.
Onyń málimeti boıynsha, Sáýlet, qala qurylysy jáne jer qatynastary basqarmasy astananyń geoaqparattyq ortalyǵyn qurý úshin 50 mln teńge surap otyr.
«Qurylys basqarmasyna kóppáterli turǵyn úı keshenderin ınjenerlik-kommýnıkatsııalyq ınfraqurylymdyq qurlysyn, «Nurly jer» memlekettik baǵdarlamasy sheńberinde úleskerlik problemalyq obektilerdi aıaqtaýǵa, polıtsııa departamentiniń jyldam áreket etetin arnaıy jasaq ǵımaratyn rekonstrýktsııalaýǵa jáne halyqtyń áleýmettik toptary úshin páterler satyp alýǵa bıýdjet ákimshiligi baǵdarlamasy arqyly 13 mlrd 445 mln teńge qarastyrý usynylyp otyr», - dedi Qaısar Mańqaraev.
