Astananyń 3 myńnan astam medıtsına qyzmetkeri alys jáne jaqyn shetelderde biliktilikterin arttyrdy
ASTANA. 12 naýryz. QazAqparat - Ótken jyly elordada 4 105 medıtsına qyzmetkeri biliktilikti jetildirý kýrstarynan ótti. Bul qaladaǵy maman medbıkelerdiń jalpy sanynyń 55 paıyzyn quraıdy.
Bul týraly astana.kz saıtyna Astana qalasynyń Densaýlyq saqtaý basqarmasynan málim etti.
Basqarmanyń málimeti boıynsha, 2012 jyly 3 032 medıtsına qyzmetkeri biliktilik kýrstary men Reseı, Belarýs, Lıtva, Avstrııa, Shveıtsarııa, Izraıl Koreıa, Sıngapýr sııaqty alys, jaqyn shetelderde alǵashqy mamandaný tájirıbesinen ótti. Onyń 56,8 paıyzy - dárigerler.
«Sondaı-aq, 2012 jyly alǵash ret biliktiligin kóterýge 129 medbıke jiberilse, olardyń 24-i Lıtvanyń densaýlyq saqtaý ǵylymı ýnıversıtetinde «Medbıke isi menedjmenti», «Hırýrgııalyq beıindegi medıtsına bıkesi qyzmetiniń zamanaýı aspektileri», «Qazirgi ambýlatorııadaǵy medıtsına bıkesi qyzmetiniń zamanaýı aspektileri» tsıkldary boıynsha oqý kýrsyn tamamdady», - delingen habarlamada.
Sonymen qatar, Astana qalasy medıtsına mekemesiniń 16 birinshi basshysy tájirıbe almasý úshin Frantsııaǵa (2), Fınlıandııaǵa (4), Koreıaǵa (4), Germanııaǵa (1), Shveıtsarııaǵa (2), Sıngapýrǵa (1), Brazılııaǵa (1) jáne Japonııaǵa (1) jiberildi. Halyqaralyq dárejede alǵan tájirıbelerin olar medıtsına mekemesine engizip, medıtsınalyq qyzmettiń menedjmenti men sapasyn arttyrýǵa paıdalanady.
«Ótken jyly álemge belgili sheteldik mamandardyń qatysýymen barlyǵy 8 sheberlik-sabaǵy ótkizildi. Olardyń aıasynda ınnovatsııalyq ádistemeler qoldanylyp, 15 ota jasaldy», - dep málimdedi vedomstvodan.
