Astananyń 29 mektebinde biryńǵaı forma engizildi
ASTANA. 19 tamyz. QazAqparat - Elordada 1 qyrkúıekte barlyq mektepter esikterin aıqara ashady.
Búgingi tańda qalada 82 mektep, sonyń ishinde 70 memlekettik, 12 jeke menshikti mektep jumys isteıdi. Bul týraly elordanyń resmı saıtynan habarlady.
Bilim basqarmasynyń málimetine qaraǵanda, jalpy bilim beretin 70 mekteptiń 29-y tolyǵymen biryńǵaı formaǵa kóshti.
«Atap aıtqanda, № 4, 29, 32, 37, 42, 52, 53, 54, 7,15, 18, 20, 23, 26, 35, 36, 40, 41, 46, 47, 56, 60, 61, 17, 24, 64, 67, 70 jáne qyzdarǵa arnalǵan QTL. Sondaı-aq, 11 mektep biryńǵaı formaǵa jartylaı kóshti (1-4 jáne 5-9 synyptar): №13, 16, 27, 30, 31, 51, 19, 34, 58, 59. Sonymen qatar, 27 mektep klassıkalyq forma (aq-qara) kıetin boldy: №5, 8, 10, 22, 28, 33, 43, 44, 48, 50, 55, 57, 1, 2, 3, 6, 12, 14, 21, 25, 49, 62, 45, «Zerde» jáne uldarǵa arnalǵan QTL», - delingen vedomstvo málimetinde.
Oqý oryndarynda mektep formalaryn kııý ıdeıasy ózekti bolyp otyr. Búginde bul jaı forma emes, ol oqýshylarǵa arnalǵan iskerlik úlgidegi kıim bolyp tabylady. Bul árbir oqýshyǵa bilim alýǵa bet burýǵa jáne ózindik tártipti damytýǵa múmkindik beredi.
Eske salaıyq, árbir mektep oqýshylarmen jáne ata-analarmen birlesip formanyń úlgisin belgileıdi. Turmysy tómen jáne kóp balaly otbasylardan shyqqan balalarǵa mektep formalaryn satyp alý máselesi demeýlik kómek arqyly, sonymen qatar mektep formasyn tigetin fırmalardyń, jappaı oqý qorynyń qarjysynyń esebinen júzege asyralady. Jalpy, Qazaqstan Respýblıkasynyń «Bilim týraly» Zańyna sáıkes, oqýshylarǵa arnalǵan mektep formasyn engizý máselesi bilim mekemesiniń quzyrlyǵyna jatady jáne mindetti túrde Jarǵyda jazylýy tıis.
