Astananyń 25 jyldyǵy: Taldyqorǵanda 98 otbasy baspanaly boldy

TALDYQORǴAN. QazAqparat - Astananyń 25 jyldyǵyna oraı Jetisý oblysynyń ákimi Beıbit Isabaev pen Taldyqorǵan qalasynyń ákimi Ernat Bázil memlekettik turǵyn úı qorynan 98 páterdiń kiltin saltanatty túrde tabystady, - dep habarlaıdy QazAqparat tilshisi.

«Taldyqorǵan qalasynda 15 myń adam úı kezeginde tur. Endigi bizdiń mindetimiz – kezekte turǵandardyń sanyn eki ese qysqartý. Ol úshin jylyna keminde 1500-2000 sharshy metr úı berýimiz kerek. Qýanyshtaryńyz uzaqqa sozylsyn. Osy úıde ónip-ósip, baqytty ǵumyr keshińizder!», – dedi oblys ákimi Beıbit Isabaev.

Taldyqorǵan qalasynda jyl basynan beri 280 adam baspanaly boldy. Endi jyl sońyna deıin taǵy 1700 adam úı alady. Nátıjesinde 51 úı paıdalanýǵa beriledi. Olardyń basym bóligi kópbalaly otbasylar, ata-ana qamqorlyǵynsyz qalǵandar, ardagerler men І-ІІ toptaǵy múgedekter.