Astananyń 241 kóshesinde jarnamadaǵy qateler tekserildi
Atap aıtqanda, Saryarqa aýdany boıynsha 91 kóshede, Almaty aýdanynda 81 kóshede, Esil aýdanynda 69 kóshede reıdter júrgizildi. Bul týraly Astana qalasynyń shaǵyn kásipkerlik sýbektileriniń, kásiporyndary men uıymdarynyń «Jarnama týraly» Qazaqstan Respýblıkasynyń Zańyn saqtaý máseleleri qalalyq máslıhattyń turaqty komıssııalarynyń kópshilik tyńdaýynda belgili boldy.
Vızýaldy jarnamalardy, kóshe ataýlaryn, anshlagtardy tekserý barysy jáne qatelerdi anyqtaý týraly Tilderdi damytý basqarmasynyń basshysy Erbol Tileshov baıandady.
«Tekserý barysynda kelesideı buzýshylyqtar anyqtaldy: kóshe ataýlary qatemen jazylǵan, kósheniń eski ataýlary jazylǵan, estetıkalyq talǵam joq, anshlagtar ilinbegen nemese ártúrli jazylǵan, ataýlar birneshe nusqada ilingen. Biz qaladaǵy 45 jarnama agenttigimen birge jumys isteımiz. Bıyl qańtar aıynan bastap jarnamalyq jáne vızýaldy aqparat boıynsha 1473 nobaıǵa saraptama júrgizildi, 238 jarnamalyq mátindegi qateler túzetildi», - dedi E. Tileshov.
Elordalyq Tilderdi damytý basqarmasy Esil aýdany prokýratýrasymen birlesip, HQKO, №54 «Nur-aı», №63 «Ásem-aı», №56 «Bereke», №53 «Mereı», №64 «Asyl bóbek» bala baqshalaryndaǵy, №45 orta mekteptegi jáne «Radýga» shaǵyn marketindegi vızýaldy jarnamanyń «Tilder týraly» QR zańyna sáıkestigin tekserdi.
Sonymen qatar, Basqarma jarnamalyq jáne vızýaldy aqparat mátinderin tekserý boıynsha 48 reıd uıymdastyrdy.
«Negizinen, jarnamalyq jáne vızýaldy jarnama mátininde jıi jiberiletin qatelerdi kelesideı toptastyrýǵa bolady: qazaq tiliniń orfografııalyq erejelerin saqtamaýdan týyndaǵan qateler; mátini qazaq tilinde jazylmaǵan vızýaldy aqparat; stılıstıkalyq qateler jiberilgen jarnama; orys tilinen sózbe-sóz aýdarylǵan jarnama», - dedi Erbol Tileshov.
Osyǵan oraı, jarnama agenttikterine ádistemelik kómek kórsetý maqsatynda «Vızýaldy jáne jarnamalyq aqparat mátinderin saraptaý» taqyrybynda semınar ótkizildi. Onda osy sala boıynsha jumys isteıtin fılologtar, jýrnalıster, dızaınerler baıandamalar jasap, jıi kezdesetin qateler boıynsha aqparattyq-taldaý jumysy júrgizildi.
