Astananyń 210 turǵynyna shaqqanda alkogoldi ishimdik satatyn bir dúkennen keledi

ASTANA. 31 qazan. QazAqparat - Astanada alkogoldi ishimdik satylatyn saýda núkteleriniń tyǵyzdyǵy boıynsha qalanyń 210 turǵynyna bir dúkennen keledi eken.

Búgin elordada alkogolge qarsy kúres máselesine arnalǵan dóńgelek ústel otyrysy barysynda «Salaýatty ómir saltyn qalyptastyrý ortalyǵynyń» dáriger-úılestirýshisi Svetlana Reshetnıkova osylaı aıtty.

«Bul óte úlken kórsetkish, ıaǵnı bizde alkogol saýdasynyń taralýy keń. Ár dúkende dál osy alkogoldi ishimdikterdiń kóptegen ár alýan túrlerin taba alasyz jáne olardyń baǵasy aıtarlyqtaı qoljetimdi», - dep synǵa aldy dáriger.

Svetlana Reshetnıkovanyń paıymdaýynsha, búginde qoǵamda ishimdikke bet burýdyń qaýpi bar. «Atap aıtqanda, alkogoldi paıdalanýdyń adam densaýlyǵyna, otbasyna jáne qoǵamǵa aýyr saldaryn tıgizetininde eshkimniń de kúmáni joq», - dep túıdi ol.

Aıta keteıik, búgin - Qazaqstan Respýblıkasynda alkogoldi paıdalanýdan bas tartýdyń ulttyq kúni. Alkogoldi paıdalanýdan bas tartýdyń ulttyq kúni elimizde 2007 jyldan bastap atap ótilip keledi. Іshimdikke salyný álemniń kóptegen elderinde, sonyń ishinde Qazaqstanda adamdy ólimge alyp keletin jáne eńbekke jaramdylyǵynan aıyratyn sebepterdiń biri bolyp tabylady. Alkogoldi paıdalaný januıada, jumysta problemaly jaǵdaılardy týyndatyp, qaıǵyly oqıǵalardyń, krımınaldyq tártiptiń, kisi óltirý men óz-ózine qol jumsaýdyń qaýpin arttyrady. Máselen, statıstıkalyq málimetterge súıensek, qasaqana jáne qasaqana emes dene jaraqattaryn salýdyń 40-60 paıyzy ishimdikti paıdalanýmen baılanysty.