Astananyń 200-ge tarta úleskeri kópten kútken páterlerine qol jetkizdi
ASTANA. Qyrkúıektiń 22-si. QazAqparat - «Samuryq-Qazyna» UÁQ-nyń tarapynan daǵdarysqa qarsy sharalar aıasynda qurylys sektoryndaǵy jaǵdaıdy turaqtandyrý maqsatynda bólingen qarjyny alǵannan keıin 3 aıdan soń, BI Group kompanııasy «Gúlder» turǵyn úı kesheniniń qurylysyn aıaqtady.
Ol úshin 450 mln.teńge ıgerildi, dep habarlaıdy«Samuryq-Qazyna» UÁQ-nyń baspasóz qyzmeti.
Eski qalada ornalasqan 12 qabatty turǵyn úıde 190 páter bar, jalpy aýmaǵy 11 myń sharshy metr. Bul keshenniń 189 páteri úleskerlerdiki.
Qurylystyń materıaly kirpish, qabyrǵalardyń qalyńdyǵy 69 sm, dybyssyz lıft ornatylǵan. Birinshi qabatynda medıtsınalyq ortalyq, dúken, jalpy turǵyndarǵa qajetti obektiler bolady.
Úıdiń eń egde turǵyny, eńbek ardageri, 40 jyldyq tájirbıesi bar akýsher-gınekolog Tóleýtaı Qabyldınaǵa páter kiltin «Samuryq-Qazyna» Qarjy jáne damý ınstıtýttaryn basqarý jónindegi dırektory Baqytjan Sárkeev tapsyrdy.
Buǵan qosa Baqytjan Sárkeev «Samuryq-Qazyna» jyljymaıtyn múlik naryǵyndaǵy máselelerdi sheshý úshin ekinshi deńgeıli bankter arqyly jáne Jyljymaıtyn múlik qory sekildi eki mehanızmdi qoldanady. Bankter arqyly Almatydaǵy jáne Astnadaǵy birqatar turǵyn úı keshenderi, osy BI Group kompanııasynyń obektileri aıaqtalyp jatyr. Daǵdarysqa qarsy sharalar aıasynda qurylys sektoryndaǵy jaǵdaıdy turaqtandyrý maqsatynda Qor osy kompanııanyń 8 obektisin qarjylandyrdy. Qordyń «Qazkommertsbankte» maqsatty túrde salynǵan depozıtiniń esebinen 23,4 mlrd.teńgege 2 722 úleskerdiń qatysy bar úılerge qoldaý jasalynýda» dedi ol.
Qor ókili «Samuryq-Qazyna» qurylysty aıaqtaý boıynsha mindet alǵan obektilerdiń barlyǵy da ýaqytynda beriledi dedi.
BI Group kompanııasynyń basshysy Aıdyn Rahymbaevtyń aıtýy boıynsha, bul qarjy holdıngtiń qalǵan obektilerin aıaqtaýǵa jetkilikti. Holdıng osylaısha, Mereke-2, Shýaqty qala-2, Baıqonys, Zerde jáne Dostar-3 turǵyn úılerin 2010 jyly aıaqtamaq. Al Lazýrnyı kvartaly, Sarmat obektileri 2011 jyldyń ekinshi toqsanynda aıaqtalady.
Úleskerlerdiń máselesin sheshýmen qatar, naryqta 2077 páter paıda bolady.
BI Group kompanııasy qazirgi kúni Astana qalasynda jalpy aýmaǵy 1 mln.sharshy metr bolatyn 10 myń páterdi aınalymǵa shyǵardy. Qurylys salasyndaǵy daǵdarysqa qaramastan, kompanııa jumysyn toqtatqan joq. Daǵdarys bastalǵannan beri 4000-ǵa jýyq páter paıdalanýǵa berildi.
