Astananyń 20 jyldyǵynyń qurmetine jıyrma myń qaraǵaı kósheti otyrǵyzyldy
ASTANA. QazAqparat - QR Parlamentiniń depýtattary, memlekettik organdardyń basshylary jáne Qazaq agrotehnıkalyq ýnıversıtetiniń stýdentteri elordanyń Jasyl beldeýine 20 myń qaraǵaı kóshetin otyrǵyzdy, dep habarlaıdy QazAqparat tilshisi.
Búkilqazaqstandyq aǵash otyrǵyzý kúnine oraı egilgen sımvoldyq kóshet sany el astanasynyń 20 jyldyq mereıtoıyna arnalyp otyr.
«Sońǵy 4-5 jyl boıy elimizde aǵash otyrǵyzý kúni turaqty ótkizilip keledi. Bul óte jaqsy bastama. Sebebi, Qazaqstanda orman alqaby 4,6 paıyzdy ǵana quraıdy. Eger jerimizdiń jalpy kólemi 272 mln gektar bolsa, bar-joǵy 12 mln gektar ǵana ormanymyz bar. Orman - kez kelgen eldimekenniń «ókpesi» bolyp sanalady. Sondyqtan, aǵash otyrǵyzý isine beı-jaı qaramaý kerek», - dedi QR Aýyl sharýashylyǵy vıtse-mınıstri Erlan Nysanbaev Jasyl beldeýdegi aǵash otyrǵyzý rásiminde.
Mınıstrlik ókiliniń aıtýynsha, 1990 jyldardyń sońynda Prezıdent Nursultan Nazarbaev Astananyń Jasyl beldeýin qurýdy tapsyrǵan. Júıeli jumystyń arqasynda búginde Jasyl beldeý kólemi 80 myń gektarǵa jetti. Bul Astananyń klımatyna, ekologııasyna oń yqpalyn tıgizedi.
«Búgingi rásim de Jasyl beldeýdiń damýyna qosqan kishkentaı ǵana úlesimiz. Kóshetter Semeıdegi tálimbaqtan jetkizildi. Semeıde shved tehnologııasy boıynsha kóshet ósiretin, Ortalyq Azııada alǵash ret ashylǵan tálimbaq bar. Onda jylyna 5 mıllıon kóshet ósiriledi», - dep óz sózin tolyqtyrdy vıtse-mınıstr.
Aıta keteıik, 21 sáýir kúni elimizdiń barlyq óńirlerinde «Búkilqazaqstandyq aǵash otyrǵyzý kúni» atalyp ótedi. Byltyr bul sharaǵa 424 myńnan astam adam qatysyp, respýblıka aýmaǵyna 620 myńǵa jýyq aǵashtar men butalar otyrǵyzylǵan.
