Astananyń 20 jyldyǵyna oraı úzdik túrik fılmderi kórsetiledi
ASTANA. QazAqparat - ıÝnýs Emre atyndaǵy túrik mádenıet ortalyǵy 2017 jyly Astana kórermenderine bir jyl boıy «Aılyq túrik fılmderi kúni» sharasy aıasynda úzdik túrik kınotýyndylaryn usynǵan bolatyn. Bul kórsetilimder Astana EKSPO 2017 sharasyna arnalǵan edi. Osy shara 2018 jyly da jalǵasyn tappaq. Bıylǵy kórsetilimder baýyrlas Qazaqstannyń bas qalasy Astananyń 20 jyldyǵyna oraılastyrylýda.
«Astana qazirgi kúnde tek ákimshilik-basqarý ortalyǵy ǵana emes, mádenıet pen óneri de qaryshtap damyp kele jatqan álemdik deńgeıdegi qalaǵa aınalyp úlgirdi. Osy oraıda ıÝnýs Emre túrik mádenıet ortalyǵy eki baýyrlas el arasyndaǵy mádenı baılanysty nyǵaıtý maqsatynda Túrkııanyń Qazaqstandaǵy elshiliginiń qoldaýymen úzdik túrik týyndylardy kórermenderge tartý etpek», - delingen mádenıet ortalyǵynyń taratqan baspasóz baıanynda.
2018 jyly Astanalyq kórermenniń kózaıymyna aınalǵan «120», «Kóbelektiń túsi», «Sońǵy hat» sııaqty fılmdermen qosa jańa kınotýyndylar da kórsetiletin bolady. Solardyń biri - tanymal túrik jazýshy Saıt Faık Abasııanyktyń «Kúnkóris qaıyǵy» atty romanynyń jelisimen túsirilgen «Ekeýmizge bir álem» fılmi.
Dramalyq fılm «Atadenızfılm» tarapynan 2016 jyly Býrgazada atty aralda túsirilgen. Rejısseri - Iylmaz Atadenız, stsenarıin jazǵan - Safa Ónal men Saıt Faık Abasııanyk. Basty róldi Erkan Merıch pen Iagmýr Aıdan somdaıdy.
Kartınadaǵy oqıǵa zeınetker Álı Ryzanyń, shashtaraz qyzy Melek jáne qaıyqpen balyq aýlap kún kórip júrgen uly Hıkmettiń, shashtaraz Kır Dmıtrııdiń mańaıynda órbıdi. Hıkmet - Álı Ryzanyń asyrap alǵan uly. Melek oǵan týǵan aǵasy retinde qaraıdy, al Hıkmettiń sezimi basqasha... Melektiń ómiri Býrgazadaǵa Fahrı kelgen soń túbegeıli ózgeredi. Shekten shyqqan qatal áke Álı Ryza men qyzy Melektiń aralaryndaǵy qaqtyǵystyń sońy nemen aıaqtalmaq, Hıkmettiń eshkim bilmeıtin syry ne?
Fılmdi Astana turǵyndary men qonaqtary 31 naýryz kúni Kerýen ortalyǵyndaǵy Kınopark zalynan tamashalaı alady.
