Astananyń 20 jyldyǵyna oraı qazaqstandyqtar úshin beınequttyqtaý baıqaýy jarııalandy
ASTANA. QazAqparat - Qazaqstan jastary úshin Astananyń 20 jyldyǵyna arnalǵan beınequttyqtaý baıqaýy jarııalandy, dep habarlaıdy QazAqparat uıymdastyrýshylarǵa silteme jasap.
Din isteri jáne azamattyq qoǵam mınıstrliginiń Jastar saıasaty departamenti «Jastar» ǵylymı-zertteý ortalyǵynyń ókilderimen birlesip, Astananyń 20 jyldyǵyna arnap, jastardyń úzdik quttyqtaýlary úshin respbýlıkalyq konkýrs jarııalady.
Konkýrs eki taqyryp boıynsha ótedi. Birinshi taqyryp - «Astana - beıbitshilik pen jasampazdyqtyń ordasy!»/ «Astana - gorod mıra ı sozıdanııa» (Memleket basshysynyń el ishinde jáne odan syrt aımaqta beıbitshilik pen kelisimdi nyǵaıtýǵa baǵyttalǵan jahandyq syrtqy saıası jáne ishki saıası bastamalaryn nasıhattaýǵa baǵyttalǵan beınerolıkter).
Ekinshisi taqyryp - «Astana - jastar qalasy!»/ «Astana - gorod molodejı!» (Qazaqstan jastarynyń jetistikterin nasıhataýǵa baǵyttalǵan beınerolık).
Konkýrstyń júlde qory 700 myń teńgeni quraıdy. Eki taqyryp boıynsha birinshi orynǵa beriletin júlde 150 myń teńgeni quraıdy, sondaı-aq ekinshi oryndardyń júldesi 120 myń teńge, úshinshi oryndardiki 80 myń teńge bolady.
Beınematerıaldyń uzaqtyǵy 30 sekýndtan 2 mınýtqa deıin bolýy kerek. Baıqaýǵa qatysýshylar ózderiniń jeke jáne ujymdasyp atqarǵan jumystaryn jibere alady. Árbir qatysýshy 1 ǵana jumys jiberýge quqyly.
Konkýrsqa 14-ten 29-ǵa deıingi jas aralyǵyndaǵy jastar qatysady.
Konkýrsqa qatysýǵa ótinish 2018 jyldyń 22 maýsymynan 3 shildesine deıin qabyldanady. 5 shildede konkýrs jeńimpazdary marapattalady. Konkýrsqa qatysý úshin uıymdastyrý komıtetiniń mailto:proekty.elzhastary@mail.ru elektrondy mekenjaıyna kreatıvti quttyqtaý joldaý qajet.
