Astananyń 20 jyldyǵyna oraı Atyraýda saltanatty jıyn ótti

ATYRAÝ. QazAqparat - Atyraý qalasynyń Qurmanǵazy atyndaǵy mádenıet saraıynda Astananyń 20 jyldyǵyna oraı saltanatty jıyn ótti, dep habarlaıdy QazAqparat tilshisi. Jınalǵan qaýymdy oblys ákimi Nurlan Noǵaev  Astananyń 20 jyldyǵymen saltanatty jaǵdaıda quttyqtady. 

«Astana - Elbasy Nursultan Nazarbaevtyń ıdeıasynan bastaý alǵan táýelsizdiktiń teńdessiz týyndysy. Búginde bas qala turǵyndarynyń sany 1 mıllıon 200 myńǵa jetti. Álemdik deńgeıdegi ozyq úlgige qurylǵan sáýlet ǵımarattary Astananyń kórkin arttyrýda», - dedi aımaq basshysy.

Sondaı-aq, elimizdiń bas qalasyn Almatydan Saryarqa tósine aýystyrý týraly tarıhı sheshimniń syndarly kezeńde qabyldanǵanyna toqtalǵan aımaq basshysy Elordanyń búginde halyqaralyq mańyzy bar saıası, ekonomıkalyq ortalyqqa aınalǵanyn atap ótti.

Saltanatty jıyn barysynda elimizdiń qoǵamdyq-saıası, áleýmettik, mádenı turǵyda damýyna úles qosyp júrgen bir top azamat «Astana 20 jyl» merekelik medalimen, «Nur Otan» partııasynyń «Belsendi qyzmeti úshin» tósbelgisimen, «Qurmet» gramotasymen marapattaldy.

Saltanatty shara sońy merekelik kontsertke ulasty.