Astananyń 20 jyldyǵyna oraı Aqtóbede saıabaq ashyldy

Osy oqıǵaǵa oraı óziniń quttyqtaýyn jetkizgen oblys ákimi Berdibek Saparbaev birinshi kezekte qysqa merzimde aýqymdy jumystardy atqarǵan qurylysshylar komandasyna alǵysyn bildirdi. Ol sonymen qatar «Astana» saıabaǵynyń oblys ortalyǵyndaǵy qonaqtar jıi qatynaıtyn tanymal oryndardyń birine aınalatynyna senim bildirdi.

«Bıylǵy jyly 20 jyldyǵyn atap ótip jatqan Astana Qazaqstannyń damýynyń jarqyn kórinisi, elimizdiń árbir azamatynyń maqtanyshy dese bolady. Barlyq qazaqstandyqtar sııaqty aqtóbelikter de osynaý ataýly datany merekeleýge barynsha úles qosýda. Osyǵan deın bizdiń óńirimiz Táýelsizdik alańynda ornalasqan «Beıbitshilik qorǵanyn» ornatsa, búgin «Astana» saıabaǵyn ashyp otyrmyz. Bul óte úlken saıabaq bolady. Bizdiń mindetimiz ony qala turǵyndary men qonaqtarynyń eń súıikti oryndarynyń birine aınaldyrý»,-dedi Berdibek Saparbaev.

Qala ortalyǵynda ornalasqan «Astana» parkiniń qurylysy tamyz aıynda bastaldy. Onyń jalpy kólemi 4,3 ga. Búgingi tańda onyń 2 ga jeri abattandyrylǵan. Nysan jyl sońynda tolyq paıdalanýǵa berilmek. Qurylys-montajdyq jumystardyń quny 266 mln teńge. Bas merdiger «Mereı Bıldıng Grýpp» JShS.

Saıabaq aýqymdy jasyl alqapty keshenniń bóligi bolmaq. Josparlaý kezinde aldyǵa qoıylǵan basty mindet - saıabaqty kórýshiler ony tamashalaý kezinde ózderin Astanada júrgendeı sezinýleri kerek. Saıabaqtyń 3D-kórinisinde elordanyń barlyq tanymal oryndary kórinis tabady.

3D-kórinistiń aınalasynda rekreatsııalyq aımaq, ıaǵnı, júrginshiler joly, shaǵyn arhıtektýralyq pishinder, klassıkalyq shamdar, oryndyqtar, músin kompozıtsııalary, balalar alańy sııaqty nysandar ornalasady.

Saıabaqtyń taǵy bir ereksheligi - eni 5-6 metr, tereńdigi 50 sm bolatyn qoldan jasalǵan sý arnasy Esil ózenin beıneleıdi. Osy arna arqyly kópir salynady. Saıabaqqa sý avtomatty túrde berilip otyrady.

Osyǵan deıin Qostanaıda birinshi ret qys mezgiline beıimdelgen aıaldama ashylǵandyǵy habarlandy.