Astananyń 20 jyldyǵyna arnalǵan poshtalyq marka shyǵady

ASTANA. QazAqparat - El astanasynyń 20 jyldyǵyna oraı búgin 1998 jyly elordaǵa arnap shyǵarylǵan alǵashqy poshtalyq markaǵa qaıta mór basý rásimi ótti, dep habarlaıdy QazAqparat tilshisi.

Aıtýly kún qurmetine Qazposhta «Astana - Qazaqstan Respýblıkasynyń elordasy»  markasynyń arnaıy mereıtoılyq shtempeli men estelik konvertin ázirlegen.
 

«Osydan 20 jyl buryn - 1997 jyldyń 10 jeltoqsanynda el astanasyn kóshirý týraly sheshim qabyldandy jáne sodan beri kóp nárse ózgerdi.  Az ǵana ýaqytta Saryarqanyń tósinde ertegidegideı ásem qala boı kóterip, álemniń úzdik astanalarynyń qataryna enip úlgerdi.  Árıne, Qazposhta da el ómirindegi asa mańyzdy mereıtoılyq sharadan tys qalmaıdy», - dedi «Qazposhta» AQ poshtalyq qyzmetter boıynsha atqarýshy dırektory Sáýle Egemberdıeva Astana ákimdiginde ótken sharada.
 

Qazposhta ókili 2018 jyly Astana qalasynyń 20 jyldyq mereıtoıy qurmetine arnaıy marka shyǵarylatynyn habarlady.

«2018 jyly qala kúni qarsańynda Astana qalasynyń 20 jyldyq mereıtoıyna arnalǵan marka shyǵarýdy josparlap otyrmyz. Qazir dızaın jáne tıraj máseleleri talqylanýda», - dep atap ótti ol.

Sáýle Egemberdıevanyń aıtýynsha, arnaıy shtempelmen mór basylǵan estelik konvertter fılatelıster úshin óte mańyzdy.

«Marka - kez kelgen memlekettiń vızıttik kartasy ispettes. Elimizdegi Fılatelıster odaǵynyń músheleri Qazaqstanda shyǵarylǵan markalar men konvertterdi ózge memleketterdegi fılatelıstermen udaıy bólisip otyrady.  Nátıjesinde bizdiń elimizge, tarıhymyzǵa, tabıǵatymyzǵa, barlyq qundylyqtarymyzǵa arnap shyǵarylǵan markalar Qytaı, Brazılııa syndy kóptegen elderge jetti. Osylaısha, fılatelıster arqyly  elimizdi álemge nasıhattaýdamyz», -  dep túıindedi sózin Sáýle Egemberdıeva.
 

Eske sala ketsek, 1997 jyldyń 10 jeltoqsanynda Qazaqstan Respýblıkasy Prezıdentiniń Jarlyǵymen el astanasy resmı túrde Almatydan Aqmolaǵa kóshirildi.

1998 jyldyń 6 mamyrynda Aqmola qalasynyń ataýy Astana bolyp ózgertildi.