Astananyń 20 jyldyǵy: Jetisýlyq alpınıster jeti shyńdy baǵyndyrdy

TALDYQORǴAN. QazAqparat - Astana qalasynyń 20 jyldyǵyna oraı jetisýlyq alpınıster 7 shyńdy baǵyndyrdy. Taýlardyń bıiktikteriniń qosyndysy 20 myń metr boldy, dep habarlaıdy QazAqparat tilshisi.

«Jetisý» geografııalyq qaýymdastyǵynyń músheleri jaz aılarynda Almaty oblysy aýmaǵyndaǵy taýlarǵa kóterilip, jetistikterin Astananyń mereıtoıyna arnady. Eń bıik shyń 7 myń metrlik Han Táńiri bolsa, eń alasasy 1500 metrlik Tekeli taýy. Sondaı-aq alpınıster Labasy, Fýrmanov, Panorama, Bashýta jáne Týrıst syndy shyńdarǵa shyǵyp qaıtty.

Qaýymdastyq jetekshisi Ánýar Demegenovtyń aıtýynsha, shyńdardy baǵyndyrýdaǵy basty maqsat taý týrızmin damytý. Jastar arasynda salaýatty ómir saltyn qalyptastyryp, alpınızmge qyzyǵýshylyqtaryn oıatý. Sondaı-aq óńirdiń geografııasyn, tarıhyn, etnografııasyn zerttep, qorjynymyzdy tyń aqparattarmen tolyqtyrý.

Ánýar Demegenovtyń aıtýynsha, qazirgi tańda «Jetisý» geografııalyq qaýymdastyq quramyna 12 adam ǵana múshe. Aldaǵy ýaqytta qaýymdastyq quramyn ulǵaıtyp, kelesi jyly jańa baǵyttar ashyp, jańa belesterdi baǵyndyrmaq.