Astananyń 20 jyldyǵy: Qyzylordalyqtar elordada ǵarysh mýzeıin salady

QYZYLORDA. QazAqparat - Elordanyń 20 jyldyǵyna oraı qyzylordalyqtar Astanada ashyq aspan astyndaǵy ǵarysh mýzeıin salady. Bul týraly aımaq basshysy Qyrymbek Kósherbaev búgin qala ákiminiń halyq aldynda esep berý kezdesýinde aıtty, dep habarlady QazAqparat tilshisi.

«Baıqońyr ǵarysh aılaǵy - qazaq halqynyń ǵana emes, búkil adamzattyń maqtanyshyna aınalǵan tarıhı keshen. Sondyqtan  Astananyń mereıtoıyna oraı elordada «Soıýz», «Proton», «Zenıt» zymyran tasyǵyshtary men «Boran» orbıtaaralyq kemesiniń maketterinen quralǵan zymyran-ǵarysh tehnıkasy mýzeıin salýdy uıǵardyq. Mýzeı ashyq aspan astynda ornalasady,», - dedi aımaq basshysy.

Oblys ákimi kezdesý barysynda, sondaı-aq Qyzylordadaǵy turǵyn úı qurylysy, ınfraqurylymdy damytý, ınvestıtsııa tartý jáne áleýmettik-ekonomıkalyq damýdyń basqa da mańyzdy baǵyttary týraly aıtty.

Q.Kósherbaev aǵymdaǵy jylǵa arnalǵan josparlardy aıqyndap, naqty tapsyrmalar júktedi.

 «Osy jyly biz  - Astana qalasynyń 20 jyldyǵy men  Qyzylorda qalasynyń 200 jyldyǵyn joǵary deńgeıde atap ótetin bolamyz. Bul eki mereıtoıdyń bizder úshin tarıhı mańyzy erekshe. Sebebi, Astana - Táýelsiz elimizdiń elordasy bolsa, Qyzylorda - 1925-1929 jyldary elimizdiń tuńǵysh astanasy mártebesin ıelenip, ultymyzǵa resmı túrde qazaq degen ataýdy alyp bergen tarıhı sheshimder ordasy. Jyl boıy kóptegen halyqaralyq, respýblıkalyq jáne oblystyq is-sharalar uıymdastyrylyp, aýqymdy nysandar ashylady. Onyń biri - Qazaq ortalyq atqarý komıtetiniń baıyrǵy ǵımaratynyń úlgisinde salynǵan «Rýhanı jańǵyrý» ortalyǵy»,-dep atap ótti oblys ákimi.