Astananyń 20 jyldyǵy: Qostanaı oblysy elordaǵa ne syılaıdy
ASTANA. QazAqparat - Qostanaı oblysynyń ákimi Arhımed Muhambetov Astananyń 20 jyldyq mereıtoıyna qandaı syı tartý etetinderin aıtyp berdi, dep habarlaıdy QazAqparat tilshisi.
"Astananyń 20 jyldyǵy qurmetine birneshe oblyspen birigip, velosıped joldaryn salyp jatyrmyz. Onda bıýdjettik qarajat ta bar, demeýshilik qoldaýlar da bar. Máselen, velosıped joldary - bıýdjet aqshasyna jasalsa, kishigirim sáýlettik músinder demeýshiler esebinen bolmaq. Bizdiń basty mindetimiz qurylysty sapaly júrgizip, ýaqytynda paıdalanýǵa berý", - dep jaýap berdi ákim jýrnalıster suraǵyna Ortalyq kommýnıkatsııalar qyzmetinde ótken baspasóz máslıhatynda.
Aıta keteıik, Qazaqstan astanasyn Almatydan Aqmolaǵa kóshirý týraly sheshim 1994 jyldyń 6 shildesinde qabyldanǵan edi. Astanany resmı kóshirý 1997 jyldyń 10 jeltoqsanynda júzege asyryldy. 1998 jyldyń 6 mamyrynda Prezıdent jarlyǵymen Aqmola ataýy Astana bolyp ózgertildi.
