Astananyń 20 jyldyǵy: Eń úzdik beınequttyqtaý anyqtaldy

ASTANA. QazAqparat - Astananyń 20 jyldyǵyna arnalǵan eń úzdik beınequttyqtaý baıqaýy qorytyndylandy. Baıqaý Qazaqstan jastary arasynda jarııalanǵan bolatyn, dep habarlaıdy QazAqparat tilshisi.

Konkýrs eki taqyryp boıynsha uıymdastyryldy: «Astana - beıbitshilik pen jasampazdyqtyń ordasy» (Memleket basshysynyń elimizdegi beıbitshilik pen kelisimdi nyǵaıtýǵa baǵyttalǵan jahandyq syrtqy jáne ishki saıası bastamalaryn kórsetetin beınebaıan) jáne «Astana - jastar qalasy» (Qazaqstan men elorda jastarynyń jetistikterin nasıhattaýǵa baǵyttalǵan beınebaıan).

Nátıjesinde, elimizdiń ár óńirinen kelip túsken 33 beınequttyqtaýdyń 9-y marapattarǵa ıe boldy.

«Bul saıysty eki apta buryn jarııalaǵan bolatynbyz. Maqsaty - jastardyń beınequttyqtaýy arqyly elordaǵa degen súıispenshilikti jetkizý. Bir qýantarlyǵy, konkýrstyń respýblıkanyń barlyq aýmaǵyn qamtýy. Ásirese, aýyl jastarynyń belsendiligi joǵary boldy. Ekinshi másele, beınequttyqtaýlar sapasynyń joǵarylyǵy. Kelip túsken 33 jumystyń ishinen, komıssııa músheleri 9 kreatıvti degen beınequttyqtaýdy iriktep aldy. Konkýrstyń júlde qory kóp emes. Biraq soǵan qaramastan, jastar belsene qatysty. Bizdiń maqsat ta sol jastardyń basyn biriktirý, belsendiligin arttyrý edi», - dedi QR Qoǵamdyq damý mınıstrligi Jastar saıasaty departamentiniń dırektory Ashat Oralov.

«Astana - beıbitshilik pen jasampazdyqtyń ordasy» nomınatsııasy boıynsha jeńimpazdar:

1 oryn - Aıdyn Anteev

2 oryn - Qaıdar Raýan

3 oryn - Saltanat Rzaeva

 

«Astana- jastar qalasy» nomınatsııasy boıynsha jeńimpazdar:

1 oryn - Karına Shaıkenova

2 oryn - Aısha Seıilova

3 oryn - Aıtmuhamed Qalmahanov

«Kreatıvti beınebaıan» nomınatsııasy - Arnaı Botanov

«Elordaǵa iltıpat» - Arman Jastalap.

«Kórermender kózaıymy» - Lev Tyryshkın.

«Konkýrsty estı sala baǵymdy synap kóreıin dedim. Oıyma kelgen birneshe ıdeıalardyń ishinen ózime unaǵan janrǵa stsenarıı jazdym. Bir kúnniń ishinde Astananyń ádemi lokatsııalaryn tańdap, túsirip shyqtym. Basynda qalta telefonǵa túsirgenmin. Sapasy durys bolmaǵan soń kameramen qaıta túsirdim.  Jeńimpaz atanǵanyma qýanyshtymyn. Onyń ústine, men Astananyń tól qurdasymyn. Sondyqtan men úshin búgin qos qýanysh», - dedi «Astana - beıbitshilik pen jasampazdyqtyń ordasy» nomınatsııasy boıynsha 1 oryn ıelengen Aıdyn Anteev.

Konkýrstyń jalpy júldelik qory 700 myń teńge: eki taqyryp boıynsha 1-oryn jeńimpazdaryna 150 myń teńge, 2-orynǵa 120 myń teńge, 3-orynǵa 80 myń teńgeden tabys etildi.

Baıqaýdy uıymdastarýshy - QR QDM Jastar saıasaty departamenti men «Jastar» ǵylymı-zertteý ortalyǵy.