Astananyń 20 jyldyǵy: Bıbigúl Tólegenova shákirtterimen birge kontsert ótkizdi

ASTANA. QazAqparat - Astananyń 20 jyldyq mereıtoıyna oraı  KSRO halyq ártisi, Sotsıalıstik Eńbek Eri, Memlekettik syılyqtyń laýreaty, akademık Bıbigúl Tólegenova jeke kontsertin ótkizdi, dep habarlaıdy QazAqparat tilshisi.

Buǵan deıin 89 jastaǵy ánshi 2014 jyly kontsert bergen edi.

"Astanada úıim bar, únemi kelip turamyn. Astananyń jańalyqtaryn qarap otyramyz. Sondyqtan, Astanaǵa qonaqqa kelmeımin, óz úıime keldim dep aıtamyn. Ózim osy qalanyń qurmetti azamaty bolǵandyqtan, 20 jyldyq meıramǵa úles qosaıyq, eldiń kóńilin kótereıik degen nıetpen kontsert ótkizýdi uıǵardyq", - dedi ánshi.

Merekelik kontsertte ónersúıer qaýym án padıshasy qazaq, orys, tatar tilderinde jandy daýysta án shyrqap, opera úzindilerin oryndady.

Sondaı-aq sahna tórinde Bıbigúl Tólegenovanyń shákirtteri - Tolqyn Zabırova, Talǵat Musabaev, Alfııa Kárimova, Azamat Jyltyrkózov, Jupar Ǵabdýllına, Dına Hamzına, Medet Shotabaev, «Daryn» memlekettik jastar syılyǵynyń laýreaty - Málik Azat syndy jas opera juldyzdary óner kórsetti. Kontsertti Astana qalasy ákimdiginiń Memlekettik akademııalyq fılarmonııasynyń Sımfonııalyq orkestri súıemeldedi.

"Barlyǵy meniń rýhanı balalarym, shákirtterim. Bular shyqqanda áli kúnge deıin taqymymdy qysyp otyramyn, ýaıymdaımyn. Olarǵa meniń jolymdy bersin. Elimiz aman bolsyn, Astanamyz kórkeıe bersin, osyndaı qýanyshty kezdesýlerge eshteńe bóget jasamasyn", - dep tilek bildirdi Bıbigúl Tólegenova.