Astananyń 20 jyldyǵy: Aqtóbede MýzART óner kórsetti
AQTÓBE. QazAqparat - Aqtóbedegi Óner ortalyǵynda «Elimniń júregi - Astana» atty merekelik shara ótti. Jastardyń mádenı tartýy keshinde MýzART toby án shyrqady, dep habarlaıdy QazAqparat tilshisi.
Aqtóbede ótken merekelik sharaǵa orta, joǵary oqý oryndarynyń stýdentteri qatysty. Jastar Astanaǵa arnap óleńder oqyp, án aıtty, bı bıledi. Astananyń 20 jyldyǵyna arnalǵan mádenı sharaǵa sharaǵa aqtóbelikter jan-jaqty daıyndalǵan. Muhtar Arynov atyndaǵy Qarǵaly qazaq orta mektebiniń oqýshysy Nurbol Hasenov úsh ret bas qalaǵa baryp kórgenin jáne bolashaǵyn Elordamen baılanystyratyn maqtanyshpen jetkizdi.
«Men Astana qalasyna úsh ret baryp, záýlim ǵımarattaryna tánti boldym. Bul ónerdiń, ǵylymnyń ortasy bolǵan, álemge qazaq atyn tanylǵan qala. Sondyqtan men de bolashaǵymdy osy qalamen baılanystyrǵym keledi. Ózim fılologııa fakýltetin tańdap otyrmyn. Astanaǵa baryp oqımyn»,- dedi mektep oqýshysy Nurbol Hasenov.
Ol «EKSPO - 2017» halyqaralyq kórmesine baryp keldi. Jas aqyn shabyt kerneıtin qalaǵa birneshe óleń arnaǵan. Búgin ol óz zamandastarynyń aldynda eń úzdigin oqyp berdi. Al ýnıversıtet stýdentti aqtóbelik jastar atynan Astanaǵa arnalǵan mádenı sharalardy uıymdastyrýǵa, Elorda atyn asqaqtatýǵa úles qosýǵa ýáde berdi.
«Elbasy Nursultan Nazarbaev óz sózinde «táýelsiz Qazaqstannyń jeti qazyna bar. Sonyń biri táýelsizdigimizdiń boıtumary ásem qala- Astana» degen bolatyn. Rasymen de Astana jańa qazaqstandyq patrıotızmdi engizdi. Óıtkeni Astanaǵa kelgen árbir shetel azamaty elimiz týraly úzdik oıyn jetkizgen kezde boıyńdy qýynysh sezimi kerneıdi. EKSPO halyqaralyq kórmesi kezinde erikti bolyp júrgende dál osyndaı sezimdi bastan ótkerdim. Astanaǵa degen maqtanysh árbir qazaqstandyqtyń júreginde jatyr. Jańa myńjyldyqtyń tuńǵysh astanasyn salyp, Esildiń boıyna jaǵalaı el qondyrǵan Elbasynyń ergili tarıhta máńgi qalary anyq. Astanamyz jaınaı bersin! Aqtóbelik jastar belsendi qatysyp, Astana abyroıyn asqaqtatýǵa úles qosamyz»,- dedi Q.Jubanov atyndaǵy Aqtóbe óńirlik memlekettik ýnıversıtetiniń stýdenti Almat Berdońǵarov.
Aıta keteıik, merekelik shara kezinde MýzART toby án shyrqady. Sonymen qatar, «Bolashaqqa baǵdar: rýhanı jańǵyrý» baǵdarlamasy aıasynda «Rahmet, saǵan týǵan el» atty án keshi de ótedi. 
