Astananyń 15 jyldyǵyna oraı «Jibek joly» atty saıys-kórme uıymdastyrylady
ASTANA. 23 maýsym. QazAqparat - QR Tuńǵysh Prezıdentiniń mýzeıinde 28 maýsym kúni «Jibek joly» atty aımaqtyq batık óneri saıysyna qatysýshylardyń jumystary qoıylatyn kórmeniń ashylýy bolady.
Bul - «Balalyq shaqtan kózqaras» atty joba aıasyndaǵy QR Tuńǵysh Prezıdenti mýzeıiniń jáne Balalar kórkemsýret mektebi - ıÝNESKO klýbynyń birlesken kezekti is sharasy.
Mundaı kólemde beıneleý óneriniń osyndaı janry boıynsha saıys-kórme Astana qalasynda alǵash ret uıymdastyrylyp otyr. Bul báseke Astana qalasy Balalar kórkemsýret mektebi - ıÝNESKO klýbynyń bastamasy bolyp tabylady.
Kórme balalar shyǵarmashylyǵy arqyly ertedegi batık ónerimen tanysýǵa múmkindik beredi. Batık - matany qolmen bezendirýdiń erekshe tehnıkasy. «Batık» termıni bizge Indonezııadan kelgen. Batık tarıhy san ǵasyrlardy qamtıdy. Alǵashynda ol jaı qol óneri, qazirgi kúnde - ónerdiń jeke bir túri bolyp tabylady. Qazirgi zamanda batık tehnıkasy arqyly Úndistanda avangardtyq kórkem shyǵarmalar dúnıege keledi. Úndistannan basqa kóptegen elder de batık ónerin ózderiniń ulttyq óneri dep sanaıdy. Olar mysaly, Indonezııa, Malaızııa, Shrı-lanka jáne Taıland. Batık tehnıkasy úlgisinde jasalǵan ǵajaıyp dúnıeler Shyǵys pen Batys elderi naryǵynda suranysqa ıe.
Batık óneri boıynsha saıysqa Astana, Almaty, Qaraǵandy, Aqtóbe, Badamsha jáne Pavlodar qalalarynan 100 astam jumystar qoıylǵan. Óner básekesine jergilikti jerlerde jumystary iriktelip alynǵan, kórkem jáne óner mektepterinde oqıtyn 10 men 17 jas aralyǵyndaǵy balalar qatysty.
Osy saıys aıasynda batık óneri boıynsha master-klastar, júldegerlerdi quttyqtaý rásimi, qalanyń kórikti jerlerine ekskýrsııalar uıymdastyrylady. Jeńimpazdar saıystyń dıplomdarymen jáne qundy syılyqtarmen marapattalady.
Kórme aǵymdaǵy jylǵy 25 tamyzǵa deıin jalǵasady.
