Astananyń 15 jyldyǵyn merekeleý kúnderi elordalyqtar qaıtadan kóshpeli mádenıetpen qaýyshady
ASTANA. 27 mamyr. QazAqparat - Astananyń 15 jyldyǵyn merekeleý kúnderi sol jaǵalaýda taǵy da kezekti ret úlken etno-aýyl boı kóteredi. 5-7 shildede «Han Shatyr» SOO-da kóshpeli órkenıettiń «Astana tóńiregindegi myńjyldyq» festıvali ótedi.
«Bul - álemdegi kóshpeli órkenıetke arnalǵan jalǵyz festıval. «Astananyń tóńiregindegi myńjyldyq» festıvali - kóshpeli qazaq halqynyń tarıhı rýhynan syr shertedi. Jyl saıyn atalǵan festıval elorda turǵyndary men qonaqtary tarapynan orasan zor mánge ıe bolyp keledi.
«Bıylǵy jyly da astanalyqtarǵa qazaqtyń baıyrǵy kóshpeli mádenıetimen qaıtadan qaýyshýǵa múmkindik týdy. Sol jaǵalaýda úlken etno-aýyl turǵyzylady. Onda kıiz úıler men shyǵys bazary, zergerlerdiń áshekeı buıymdary, sahna alańdary ornatylyp, atty-áskerı shoýy ótedi»,-delingen astana.kz saıtynda.
Bul jerde dámi til úıiretin baýyrsaqtan aýyz tıip, qymyz, shubat syndy qazaqtyń ulttyq sýsyndarynan dám tatýǵa bolady.
Túrki halyqtarynyń baǵa jetpes asyl qazynasy astanalyqtar men qala qonaqtaryna, sondaı-aq, Astana qalasynyń 15 jyldyq mereıtoıyna keremet tartý bolmaq.
