Astanany josparlaǵan japondyq sáýletshiniń artyqshylyǵy nede - Nazarbaevtyń jaýaby
«Astana qalasynyń sáýlettik josparyna jarııalanǵan konkýrs álemdik qurylysshylardyń qyzyǵýshylyǵyn týdyrdy. Kez kelgen sáýletshi úshin ashyq dalada jańa qalany josparlaý - shabytyna shabyt qosyp, óz qııalyn pash etetin úlken múmkindik. Konkýrsqa Japonııa, AQSh, Aýstralııa, Italııa, Frantsııa, Koreıa, Bolgarııa jáne ózge de elderden elýden astam joba kelip tústi. Olardyń arasynan 27 joba iriktelip alyndy. Іrikteý nátıjesinde qazirgi zamannyń talantty sáýletshisi Kısıe Kýrokavanyń jobasy úzdik dep tanyldy. Tanymal kontseptýalıstiń ıdeıasyna sáıkes, qalanyń sol jaǵalaýyna basymdyq berildi. Árıne, ol joba jaı ǵana ıdeıa boldy. Shynaıy ómirde biraz túzetýler engizýge týra keldi. Biz de ómir talaptaryna moıynsunyp, iske kiristik», - dep eske aldy Prezıdent.
Memleket basshysy jańa astananyń jan-jaqqa ulǵaıyp megapolıske aınalǵanyn qalamaǵan.
«Jasyratyny joq, jańa elorda salý - meniń bastamam. Men sáýletshilerge qalanyń jan-jaqqa sozylyp jatqan jansyz megapolıske aınalmaýy týraly talap qoıdym. Kýrokava bul talapty eskere otyryp, «Ómir ustanymy» dep atalatyn biregeı joba usyndy. Osylaısha, konkýrsta jeńip shyqty. Men qalanyń jansyz nysan ǵana emes, adammen, tabıǵatpen baılanysty tiri aǵza retinde qalyptasqanyn qaladym», - deıdi Elbasy.
Sondaı-aq, Prezıdent álemniń ózge astanalaryna sapary men Astananyń aralas sáýlettik stıli týraly áńgimelep berdi.
«Brazılııaǵa barǵanymyzda, maǵan Oskar Nımeıer jobalaǵan el astanasy - Brazılıanyń modernıstik stıli unady. Kez kelgen qala birkelki salynsa, kórinedi. Sáıkesinshe, Astanada klassıkalyq sáýlet pen modern stılindegi sáýlettik ǵımraattar qatar damýy tıis. Múmkindiginshe, solaı jasap jatyrmyz. Aqorda, «Astana opera» teatry, syrtqy ister mınıstrliginiń ǵımaraty, «Astana Trıýmf» klassıkalyq stılde salynsa, «Astana - Taýer», «Han shatyr», «Astana-Arena», «Soltústik shuǵylasy» TK - úshinshi myńjyldyq sáýletiniń úlgileri», - dep atap ótti Nursultan Nazarbaev.
«Eń bastysy - qalalyq ınfraqurylym ózinshe qalyptasyp keledi. 2010 jyly Astanada EQYU sammıtin ótkizgende qalanyń durys baǵytta damyp jatqanyn baıqadyq. 55 eldiń delegatsııasyn qabyldap, myńdaǵan adamǵa qyzmet kórsetý, logıstıka, qaýipsizdik máselelerin sheshý ońaıǵa soqpady. Bul kópǵasyrlyq tarıhy bar, dástúri qalyptasqan astanalar úshin de aýyr. Elorda bul synaqtan súrinbeı ótti», - dedi Prezıdent.
Tolyq suhbatty «Kazahstanskaıa pravda» gazetinen oqýǵa bolady.
