Astanany jastar qalasy deýge bola ma
ASTANA. QazAqparat - Astana qalasynyń jastar saıasaty basqarmasynyń málimetine sáıkes, búginde qaladaǵy jastardyń sany 220 myń adamdy qurap otyr. Olardyń barlyǵy - 14-29 jastaǵy azamattar, dep habarlaıdy QazAqparat tilshisi.
«Stýdentterge keler bolsaq, kolledjderde oqıtyn jastardyń sany - 26 722, al joǵary oqý oryndarynda 52 748 myń adam oqıdy», - deıdi basqarma basshysynyń mindetin atqarýshy Erbol Ryspaev.
Onyń sózine qaraǵanda, bilim alyp júrgen jastardyń ishinde tek 10 989 stýdent qana jataqhanada turady. Qazirgi kezde bes ýnıversıtet janynan jańa jataqhanalar salynyp jatyr. Onda stýdentter de, oqytýshylar da ornalaspaq.
Aıta keteıik, mamyr aıyndaǵy statıstıkalyq málimetterge sáıkes, Astanadaǵy halyqtyń jalpy sany 880 myń 191 adamdy quraǵan. Alaıda, shildeniń 4-i kúni qala ákimi Áset Isekeshev mıllıonynshy turǵyn - qyz balanyń dúnıege kelgenin málimdep, jas otbasyǵa páter kiltin tabystaǵan bolatyn.
Artynan qalanyń ishki saıasat basqarmasy qala turǵyndaryn esepke alýdyń ádistemesin túsindirip berdi. Oǵan sáıkes, sol kezde elordanyń emhanalarynda 927 260 adam tirekýde turǵan. Qoǵamdyq kólikpen kún saıyn 850 adam júrgen edi. Al jyl basynan beri taǵy 61 myń jumysshy tirkeýge qoıyldy. Osylaısha, shildeniń 1-i kúngi esep-qısap boıynsha Astanada 999 780 adam bolǵan. Búginde atalǵan kórsetkish mıllıonnan asyp otyr. Sonyń tórtten biri- jastar.
