Astanany jaryqtandyrýǵa kún saıyn 112 myń kVt/saǵ elektr energııasy qajet
ASTANA. QazAqparat - Qarańǵy túsken ýaqytta túngi jaryqtandyrý elordanyń kelbetin ereksheleı túsedi. Qazaqstannyń bas qalasy orta eseppen 112 495 kVt/saǵ elektr energııasyn tutynady, dep jazady astana.gov.kz.
Oramdar ishin, qala kóshelerin, baqtar men gúlbaqtardy, jaǵalaýdy jaryqtandyrý úshin «Astana qalalyq jaryq» JShS jaýap beredi. Búginde olardyń balansyna baqtar men jaıaý júrginshiler joldaryn jaryqtandyrýdyń 18 myńǵa jýyq shamdary, 31 myńǵa jýyq jol mańy shamdary jáne 3 myńnan asa oramishilik jaryqtandyrý quraldary jatady.
Qazirgi ýaqytta Astanada pılottyq rejımde syrtqy jaryqtandyrýdy basqarý men qýatyn retteý boıynsha jańa tehnologııalar engizilýde.
«Astana qalalyq jaryq» JShS ókilderiniń aıtýynsha, «DNaT» markaly shamdardan jaryq dıodty shamdarǵa (búgingi kúni 5686 danasy ornatylǵan) birtindep kóshý júrgizilýde. Olar Beıbitshilik kóshesinde, «Han Shatyr» saýda-oıyn-saýyq ortalyǵynyń aınalasyna, Kenesary dańǵylynda (Bókeıhan kóshesinen Saryarqa dańǵylyna deıin) jáne qalanyń basqa aýdandarynda ornatylǵan.
