Astanany jańbyr sýynan qutqaratyn káriz nysany salyndy

ASTANA. QazAqparat - Astanada sý ótkizý qabileti eki ese joǵary taǵy bir nóserlik káriz nysany salyndy, dep habarlaıdy QazAqparat ákimdiktiń medıa ortalyǵyna silteme jasap. 

Qala ákimi Áset Isekeshev Esil ózeniniń sol jaǵalaýynda salynyp bitken nóser sýynan tazartatyn ǵımaratty baryp kórdi.

Aıta keterligi, Memleket basshysynyń tapsyrmasymen qalalyq ákimdik tabıǵı sel men nóserdiń sýynan qorǵaný úshin «Astana qalasyndaǵy nóserlik kárizderiniń júıesin damytý» jobasyn sátti túrde júzege asyryp jatyr.

Joba Astanadaǵy nóserlik káriz júıesin damytý joldardyń jabyndysyn, ǵımarattar men qurylystardyń negizi men irgetasynyń saqtalýyn qamtamasyz etedi. Tazalaıtyn nysannyń táýligine 19 590 tekshe metr (salystyrmaly túrde alsaq, bul shamamen 4 myń júzetin basseın) sýdy ótkize alady.

Esterińizge sala keteıik, jazda nóser jańbyrdyń sýy elordalyqtardy ábigerge salatyn bolatyn. Sebebi, sol jaǵalaý jaqta jaýyn-shashynnan artylǵan tasqyn sýdy káriz júıesi retteýge shamasy jetpedi ári oǵan oryn da qarastyrylmaǵan bolatyn. Memleket basshysy jaýyn sýynyń máselesin sheshýdi tapsyrǵan bolatyn.

Osyǵan baılanysty, qala ákimdigi jaýyn sýyn tazartý jáne sý tartý boıynsha keshendi baǵdarlama jasap shyqty. Baǵdarlamada ınnovatsııalyq tehnologııa men tehnıkalyq sheshimdermen birge, eń úzdik álemdik tájirıbeler de eskerildi. 

2017 jyldyń sońyna deıin tazartatyn ǵımarat kesheni paıdalanýǵa berilip, Turan dańǵylynan Syǵanaq kóshesiniń qıylysyna deıin jáne Esilden Kishi Taldykól ózenine deıin sý aıdaıtyn kollektor iske qosylady.